BOBONARO, 05 fevreiru 2025 (TATOLI)—Ponte Bulobu ne’ebé lokaliza iha área Samutaben, suku Manapa ne’e liga husi postu administrativu Cailaco ba kapitál Maliana, munisípiu Bobonaro ameasa atu kotu, tanba nia estrutura hetan presaun makaas husi korrente bee-mota.
Prezidente Autoridade Munisípiu Bobonaro, Alexandre Pires, afirma Autoridade Munisípiu sei buka meius atu halo normalizasaun urjénsia, maske iha tinan 2024 ne’e ekipa tékniku husi Institutu Jestaun Ekipamentu Apoia Dezembolvimentu Infraestrutura, Institutu Públiku (IGEADI, I.P) Brigada Maria-Tapo halo ona normalizasaun.
Notísia Relevante: IGEADI normaliza ponte Samutaben ligasaun Cailaco-Maliana
“Agora ponte ne’e atu kotu ona, se ida-ne’e mak udan la para loron-kalan, tempu badak ponte ne’e labele liu ona. Entaun, saida mak Prezidente Autoridade atu halo, nune’e halo normalizasaun emerjénsía nian lai, depois lori tama iha ba prosesu orsamentu nian. Se lae, susar tanba ohin ha’u haree servisu ne’ebé halo tiha ona la kualidade karik, tanba mota mai bosok de’it ponte ameasadu atu kotu,” Alexandre Pires informa ba jornalista sira iha Cailaco, kuarta ne’e.
Alexandre Pires hatutan, Autoridade Munisípiu Bobonaro mós sei tau problema ne’e iha ajenda vizita Primeiru-Ministru, Kayrala Xanana Gusmao ne’ebé sei realiza entre fulan-marsu no abríl 2025 ne’e.
“Primeiru-Ministru haree ho matan katak povu iha postu Cailaco sofre tebe-tebes. Aleinde ponte aat, estrada mos aat tanba ate agora seidauk responde ba sira, ida-ne’e orsamentu munisípiu nia labele responde, tanba orsamentu boot, volume servisu mós boot,” nia dehan.
Diretór Servisu Munisipál Obra Públika, Munisípiu Bobonaro, Marcelino Gonçalves Godinho, komfirma Governu anunsia ona kompañia manan-na’in atu normaliza mota hodi proteje no asegura estrutura Ponte Bulobu.
“Ita espera iha tempu badak kompañia bele asina ona kontratu ho Governu atu nune’e ita bele asegura ona ponte Bulobu,” nia dehan.
Tuir dadus ne’ebé Agência Tatoli asesu katak ponte ne’e kuaze hetan normalizasaun dala-rua (2) ka tolu (3) ona husi Institutu Jestasaun Ekipamentu Apoia Dezembolvimentu Infraestrutura, Institutu Públiku (IGEADI, I.P) Brigada Maria-Tapo.
Enkuantu, ponte ne’e aleinde liga ba kapitál Maliana, liga mós ba estrada iha área Biluma, postu administrativu Hatulia, Munisípiu Ermera.
Notísia Relevante: Korrente mota kontinua sobu ponte ligasaun Cailaco-Maliana
Jornalista : Sergio da Cruz
Editór : Cancio Ximenes
