BOBONARU, 05 Maiu 2025 (TATOLI) – Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P, sigla Portugués) brigada Maria Tapó, konklui ona normalizasaun ba estrutura ponte Bulobu, iha área Samutaben, suku Manapa, postu Administrativu Kailaku liga bá kapitál Maliana ne’ebé danifika husi dezastre naturál.
Komunidade Kailaku, Marcelino Barros, agradese ba governu tanba bele responde ona preukupasaun públiku nian, tanba ho intervensaun IGEADI ne’e bele fasilita ona movimentasaun transporte públiku no privada.
Notísia Relevante: Falta metru-ida ponte Bulobu kotu
“Agora, ami asesu bá-mai di’ak ona, livre, tanba Governu mai hadi’a tiha ona. Ami povu sente kontente bele lori produtu lokál bá fa’an iha merkadu Maliana. Udan mós bá-mai di’ak hela”, nia dehan ba Tatoli, ohin.
Aleinde ne’e, motorista kamioneta Pedro dos Santos de Araújo hateten sente seguru ona asesu bá-mai ponte ne’e, tanba foin lalais mota sobu tiha.
“Ami tula rai-henek todan ne’e atu liu ta’uk los, tanba rai leten ne’e monu tomak tiha hela de’it rohan atu kotu totál. Agora di’ak ona tanba foin lalais makina boot sira mai aterru halo kabeer tiha”, dehan.
Hanesan motorista ne’ebé durante ne’e sempre movimentu husi kapitál Maliana bá postu administrativu Kailaku, Pedro rekomenda ba Governu atu kontinua tau-atensaun ba ponte ne’e, tanba normalizasaun ne’e la dura ba tempu naruk.
“Ita nia governu tenke loke tender para hadi’a fali penahan ida liga husi estrada mai ponte ne’e para metin fali. Agora sira tau de’it fatuk ho rai-henek iha ka’ut laran mak tahan de’it. Ne’e udan mai sobu fali, hansan tinan uluk mós sira tau tiha sobu fali. Ida-ne’e kuaze halo dala-tolu ou ha’at ona más nafatin aat”, nia lamenta.
Daudaun ne’e Governu kontrata ona empreza lokál rua konstrui muru protensaun iha mota laran hodi proteze estrutura ponte Bulobu husi korrente bee-mota.
Notísia Relevante: Ponte Bulobu ligasaun Cailaco-Maliana ameasa atu kotu
Jornalista: Sergio da Cruz
Editora: Maria Auxiliadora
