Anthony Albanese hetan resesaun ofisiál iha Palásiu Prezidensiál
DILI, 28 Janeiru 2026 (TATOLI) – Primeiru-Ministru Austrália, Anthony Albanese, hahú nia vizita ofisiál mai Timor-Leste, ne’ebé marka husi enkontru nivel altu ho Prezidente Repúblika, José Ramos-Horta, Xefe Guvernu, Xanana Gusmão, no Prezidente Parlamentu Nasionál, Maria Fernanda Lay, hodi reforsa relasaun diplomátika entre nasaun rua.
Husi aeroporto, Anthony Albanese to’o iha Palásiu Prezidensiál, ne’ebé simu ho Guarda Onra, ho hinu nasionál nasaun rua ni’an, tuir kedas ho inspesaun ba parada militár. Ajenda ofisiál kontinua ho aprezentasaun membru Governu no entidade ofisiál sira, asinatura Livru Onra, no sesaun foto ofisiál.
Hafoin ne’e, hahú enkontru bilaterál restritu entre José Ramos-Horta ho Anthony Albanese, ho asesu limitadu ba orgaun komunikasaun sosiál sira.
Iha enkontru bilaterál ne’e, José Ramos-Horta akompaña husi membru Governu ho Primeiru-Ministru Austrália no nia delegasaun. Enkontru ne’e remata ho troka prenda institusionál, no hafoin ne’e, Anthony Albanese ho nia delegasaun husik Palásiu Prezidensiál hodi kontinua halo vizita ba Palásiu Governu hodi hasoru malu ho nia omólugu ho membro Ezekutivu sira seluk.
Enkontru ne’e sei remata ho assinatura akordu ne’ebé hanaran Parseria Foun ba Era Foun, ho obejtivu atu hametin kooperasaun bilaterál iha área estratéjiku oioin.
Primeiru-Ministru australianu sei halo mós diskursu iha sesaun solene iha Parlamentu Nasionál, tuir konvite husi Prezidente Lejislativu, Maria Fernanda Lay, ne’ebé sei subliña importánsia iha parseria entre nasaun rua ho énfaze ba kompromissu hamutuk iha paz, dezenvolvimentu sustentável no estabilidade rejionál.
Iha kontestu vizita ofisiál ida-ne’e, iha mós serimónia kondekorasaun ne’ebé sei hala’o iha Palásiu Prezidensiál, iha ne’ebé Prezidente Repúblika sei kondekora Primeiru-Ministru Austrália ho Órdem Grande Kolár Timor-Leste.
Vizita Primeiru-Ministru Austrália reflete importánsia estratéjika husi parcería entre Timor-Leste no Austrália, ne’ebé fó enfaze ba kooperasaun polítika, ekonómika no seguransa, no mós ba fortalesimentu istóriku entre nasaun rua.
Notísia relevante: PM Austrália kumprimenta Komunidade Timor-Leste ho Mini Moke
Jornalista: Afonso do Rosário
Editora: Isaura Lemos de Deus
