DILI, 28 Janeiru 2026 (TATOLI) – Primeiru-Ministru Austrália, Anthony Albanese halo viajen ba Dili, Timor-Leste hodi hala’o vizita ofisiál iha loron 28 to’o 29 Janeiru 2026 hodi hasoru Prezidente Repúblika, José Ramos-Horta no Primeiru-Ministru Kay, Rala Xanana Gusmão.
Durante vizita ofisiál ne’e Austrália no Timor-Leste fahe parseria ne’ebé metin iha setór lima: kooperasaun seguransa, dezenvolvimentu ekonómiku, saúde, edukasaun no ligasaun komunitária.
Enkuantu iha Dili, líder sira sei diskute oportunidade sira atu hametin liután relasaun no atu promove rejiaun ida ne’ebé hakmatek, estavel no prósperu.
Primeiru-Ministru Albanese mós sei diskursu iha Parlamentu Nasionál Timor-Leste. Ida-ne’e sei sai Primeiru-Ministru Albanese nia vizita dahuluk mai Timor-Leste.
Sitasaun sira ne’ebé atribui ba Primeiru-Ministru Anthony Albanese.
“Ha’u hein atu hasoru malu ho Prezidente Ramos-Horta no Primeiru-Ministru Gusmão no sente onradu tanba hetan konvite hodi halo diskursu iha Parlamentu Nasionál timoroan,” refere nota imprensa ne’ebé TATOLI asesa husi portál ofisiál Gabinete Primeiru Ministru Austrália nian, kuarta ne’e.
“Iha rezervatóriu ida ne’ebé kle’an kona-ba respeitu, amizade no solidariedade entre povu timoroan no australianu.”
“Ligasaun sira-ne’e pesoál tebes liuhosi esperiénsia sira ne’ebé fahe durante Funu Mundiál Daruak, luta timoroan nian ba independénsia, no diáspora vibrante timoroan nian iha Austrália.”
“Timor-Leste nia adezaun foin lalais ne’e ba Asosiasaun Nasaun sira Sudeste Aziátiku nian hanesan realizasaun istóriku ida ne’ebé reflete ita-nia kompromisu hamutuk ba kooperasaun rejionál.” PM Albanese hateten.
Vise-Primeiru-Ministru Richard Marles sei sai Primeiru-Ministru Interinu to’o Primeiru-Ministru fila hosi rai-li’ur.
Notísia relevante: Primeiru-Ministru Austrália vizita Timor-Leste iha inísiu tinan foun
