DILI, 13 Janeiru 2026 (TATOLI)-Deputadu husi Partidu Kongresu Nasionál Rekonstrusaun Timorense (CNRT, sigla portugés), Virgílio Pereira, husu Ministériu Saúde (MS) atu disponibiliza ambulánsia multifusaun ida ba sentru saúde, iha postu administrativu Baguia, munisípiu Baukau.
“Karreta multifunsaun ida ne’ebé halo operasaun iha postu Baguia nia kondisaun ladi’ak, trasaun laiha. Entaun, afeta ba komunidadem, liuliu iha suku tolu iha Osohuna, Afalokai no Haekoni, bainhira pasiente iha labele transfere bá postu Baguia” Nina hato’o iha reuniaun plenária Parlamentu Nasionál, ohin.
Tuir nia, problema falta ambulánsia ne’e kle’ur ona no horisehik komunidade husu ajuda ba polísia eskuadra Baguia mak tula pasiente ida hodi bá postu Baguia no kontinua mai iha ospitál referénsia Baukau. Tanba ne’e, nesesita atensaun urjente hodi atende povu iha baze bainhira presiza.
Iha plenária ne’e, deputada husi Partidu Frente Revolusionária Timor-Leste Independente (FRETILIN), Helena Martins, solisita atu iha mellora, jestaun, atendimentu saúde iha territóriu no disponibiliza serbisu sira ho di’ak ba povu.
Nune’e mós deputada FRETILIN, Maria Angélica Rangel, levanta preokupasaun ne’ebé deskonfia mosu má prátika husi profisionál saúde balun ne’ebé atende pasiente ida ho moras denge, ne’ebé ikus mai lakon vida. Nune’e husu atu hadi’ak atendimentu.
Jornalista: Nelson de Sousa
Editora: Maria Auxiliadora
