DILI, 23 Janeiru 2026 (TATOLI)–Diretór Ezekutivu Timor-Leste Coalition for Education (TLCE), José Monteiro sujere ba Ministériu Edukasaun (ME) katak bainhira atu halo rekrutamentu ba manorin desportu nian labele haree ba nia diploma.
“Loos duni, ha’u mós rona katak ME difísil hetan manorin ba matéria desportu. Tanba ne’e, sira tenke rekruta. Kestaun Universidade Nasionál Timor Lorosa’e (UNTL) seidauk iha nivel lisensiatura ba desportu, ida-ne’e diskute iha futuru. Problema mak eskola sira agora menus manorin ba matéria desportu,” nia dehan ba TATOLI via WhatsApp, Sesta ne’e.
Tuir nia katak ME tenke hatene liu asuntu ida-ne’e tanba uluk problema hanesan ne’e laiha, agora iha fali.
“Ita tenke konxiente katak dezempregu bele barak maibé la’os ema hotu hakarak sai manorin, nune’e ME bele halo re-kontrata fali manorin matéria desportu. Nia kontratu la estende no karik balun tama ba reforma, entaun hahú rektruta bolsa kandidatu ba matéria desportu no haruka kontinua kedas ba lisensiatura,” José informa.
Entretantu, Diretór Eskola Sekundária Jerál 10 Dezembru Komoro, Manuel Verdial hateten eskola referida presiza tan manorin na’in-rua hodi bele kompleta ba na’in rua seluk.
Notísia relevante: Estudante UNTL solisita Reitór Eleitu no MESSK transforma Departamentu Desportu ba lisensiatura
“Manorin ba matéria desportu ne’e iha na’in-rua. Ida mai ho área desportu UNTL no ida fali ne’e ami husu apoiu asistente hodi hanorin. Maibé, ba tinan ne’e, ami presiza na’in-rua tan,” nia subliña.
Tuir Lei Baze Edukasaun katak manorin ho nivel lisensiatura mak hanorin ensinu sekundáriu maibé manorin desportu iha Eskola Sekundáriu 10 Dezembru antes ne’e ho Diploma III entaun la’o lai ho ida-ne’e.
“Ita presiza manorin ne’ebé iha esperiénsia desportu ne’e. Maibé, ema dehan baxarelatu labele maibé ha’u dehan ba hanorin matéria ida ne’ebé lai. Nia la’ós hanorin siénsia, ne’ebé hanorin desportu ne’e di’ak hela,” Manuel dehan.
Enkuantu, Diretór Eskola Sekundária Jerál 04 Setembru UNAMET Balide, Sergio Alfredo da Cruz, hateten manorin desportu na’in-tolu (3) mak destaka iha Eskola Sekundária Jerál Setembru UNAMET Balide.
“Ba ami Eskola Sekundáriu 04 Setembru UNAMET Balide, sufisiente ona ho manorin na’in-tolu. Sira-ne’e maihosi estudante UNTL hotu,” nia haktuir.
Dirijente ne’e dehan entre sira-na’in tolu ne’e ida mai ho background desportu no na’in-rua seluk ne’e mai ho background Indonézia no matemátika, maibé sira rua hanorin kle’ur ona ne’ebé prosesu aprendizajen la’o ho di’ak hotu.
Jornalista: Osória Marques
Editór: Xisto Freitas da Piedade
