BOBONARU, 28 Janeiru 2026 (TATOLI) – Prosesu ensinu no aprendizajen iha Ensinu Báziku Sentrál (EBC, sigla portugés) iha suku Tapo, postu administrativu Bobonaru, munisípiu Bobonaru, funsiona hikas hafoin paradu durante semana ida-resin.
Atividade ensinu lala’o tanba anin-boot foin lalais ne’e sobu tiha uma kakulu saladeaula tolu ne’ebé uza ba atividade hanorin.
“[Prosesu ensinu ba alunu] terseiru siklu la’o normál, primeiru no segundu siklu barak mak seidauk marka prezensa, tanba ohin loron mak foin aula normál”, Diretór EBC Tapo, Casemiro Pinto, informa ba Tatoli.
Nia dehan bainhira klima di’ak jerente eskola no inan-aman sira sei halo reabilitasaun ba eskola ne’ebé danifika husi dezastre naturál.
Lembra katak, iha loron 22 Janeiru, Ministériu Edukasaun fó ona apoiu materiál hanesan zinku tahan 200, pregu, besi-baja no seluk tan.
EBC Tapo iha saladeaula 17 ho totál estudante hamutuk 309 no manorin 17. EBC ne’e akumula mós estudante husi Ensinu Báziku terseiru siklu husi suku Leber no Oe-leu.
Notísia relevante: EBC Tapo simu ona apoiu materiál husi ME
Jornalista: Sergio da Cruz
Editora: Maria Auxiliadora
