DILI, 28 Janeiru 2026 (TATOLI)—Diretór Interinu, Servisu Saúde Munisípiu Dili (SSMD), Abílio Inácio hateten husi semana dahuluk to’o datoluk tinan ne’e, Servisu Saúde Munisípiu Dili rejista kazu dengue hamutuk 223 no to’o semana dahaat rejista ona kazu hamutuk 386. Nune’e, totál kazu dengue ne’ebé rejista iha Dili oras ne’e daudaun hamutuk 609.
“Hahú hosi 01-27 fulan-Janeiru, ami rejista ona kazu dengue hamutuk 609. Husi númeru ne’e rejista mate na’in-rua,” nia hateten ba jornalista sira iha nia kna’ar fatin, Bairru Formosa, Dili, Kuarta ne’e.
Responsavel ne’e akresenta kazu dengue ne’e fahe ba kategoria tolu mak hanesan dengue kamaan 426, dengue moderadu 179 no dengue grave ho kazu ualu (8).
“Iha dengue grave ho kazu ualu ne’e, la konsege salva labarik na’in-rua, enkuantu sira seluk kontinua hetan tratamentu,” nia haktuir.
“Sentru saúde sira iha Dili laran nakonu ho kazu dengue. Balun transferidu ba Vera-Krúz no ita mós transfere ona 130 ba Hospital Nacional Guido Valadares,” Abílio hatutan.
Notísia relevante: MS halo fumigasaun iha área risku ba dengue, na’in-haat lakon vida
Nia esplika kazu dengue ne’ebé rejista iha Sentru Saúde Komoro hamutuk 316, Sentru Saúde Bekora 199, Sentru Saúde Vera-Krúz ho kazu 62 no ikus liu Formosa ho kazu 32.
“Iha termu prevensaun, ami-nia ekipa promosaun saúde dezenvolve ona kampaña sensibilizasaun iha komunidade no hala’o kampaña limpeza, fumigasaun, fahe insektisida iha komunidade ne’ebé afetada ho moras dengue,” nia subliña.
Jornalista: Osória Marques
Editór: Xisto Freitas da Piedade
