DILI, 28 Janeiru 2026 (TATOLI)—Prezidente Tribunál Rekursu, Afonso Carmona, informa, tinan ne’e sei hahú konstrusaun edifísiu Tribunál Judisiál Primeira Instánsia iha Munisípiu Baukau, Vikeke, Ermera no Bobonaru iha Fulan-Marsu.
“Rai ba konstrusaun edifisiu Tribunál Judisiál Primeira Instánsia Ermera entrega ona, Vikeke sei hala’o serimónia entrega rai ba konstrusaun iha iha loron 30 agora tuku 10:00. Enkuantu rai ba konstrusaun edifísiu Tribunál Judisiál Primeira Baukau sei halo iha Tribunál ida agora ita sei formaliza iha semana oin no rai ba konstrusaun serimónia atribuisaun Tribunál Judisiál Primeira Instánsia Bobonaru sei halo mós iha semana oin,” Carmona hateten ba Jornalista sira iha Tribunál Rekusu, Kaikoli, Kuarta ne’e.
Notísia relevante : Konstrusaun edifísiu Tribunál Primeira Instánsia Bobonaru hahú
Nia dehan, Governu entrega ona dezeñu ba konstrusaun edifísiu iha munisípiu haat ba empreza konstrutór iha semana kotuk.
“Agora ita foku uluk lai ba atribuisaun rai para fó biban ba empreza bele halo ona konstrusaun iha Fulan-Marsu,” nia akresenta.
Carmona esplika, konstrusaun ba edifisiu Tribunál iha munisípiu haat ne’e tuir dezeñu kompleta ho rezidénsia ba juíz sira.
“Konstrusaun ba edifisiu Tribunál iha munisípiu haat ne’e ho totál osan millaun $4, ne’ebé prevee iha Orsamentu Jerál Estadu 2026 no tau iha Konsellu Administrasaun Fundu Infraestrutura,” nia katak.
Jornalista : Natalino Costa
Editora : Julia Chatarina
