DILI, 28 Janeiru 2026 (TATOLI)—Diretór Jerál Sekretaria Estadu Igualidade (SEI), Armando da Costa, hateten kona-ba asédiu sexuál hasoru feto ne’ebé akontese iha Institutu Ensinu Superiór balun, nesesáriu tebes hamosu regulamentu hodi halo prevensaun.
“Servisu ne’e ein-kooperasaun ho universidade no Ministériu Ensinu Superior, Siénsia no Kultura. Agora, husi polítika SEI ne’ebé sei implementa mak abordajen intregadu bazeia ba jéneru, katak se asuntu ka área ne’e pertense ba Ministériu Edukasaun ho MESSK iha kontestu ida-ne’e, entaun sira mak bele foti hanoin sira atu hamosu dekretu-lei, hamosu rezolusaun ka regulamentu ruma,” Armando da Costa hateten ba jornalista sira iha Suai Room, Kuarta ne’e.
Nia dehan SEI ho parseiru mak apoiu no kolabora hodi servisu hamutuk prodús dokumentu polítika relevante sira ne’ebé presiza.
Notísia relevante: UNTL submete proposta lei asédiu sexuál ba MESSK
“Ida-ne’e nesesáriu maibé iha diskusaun ita bele dezenvolve nia evolusaun no ita presiza to’o iha nivel ida oinsá. Importante mak ita iha asuntu no guia iha-ne’ebá. Se ita-boot sira akompaña no nota katak antes ita halo diseminasaun programa kampu seguru relasiona ho violénsia bazeia ba jéneru iha universidade, ita ladún rona no ladún foka sai maibé iha tinan hirak ikus mai to’o agora eziste progama ba universidade sira ho naran kampus seguru liuliu iha prevensaun violénsia bazeia ba jéneru nian. Ita rona katak iha infomasaun komesa mosu no estudante ka manorin na’in sira balun relata situasaun balun iha universidade la’ós katak balun foin akontese de’it hodi bainrua maibé akontese dalan barak ona,” nia haktuir.
Nia akresenta liuhusi programa kampus seguru mak iha ona koñesimentu no korajen atu hato’o situasaun balun ne’ebé akontese iha universidade sira.
“Hafoin ita implementa progama kampus seguru, ita ho MESSK asina akordu ho universidade públika no privada sira hotu atubele intrega programa ne’e iha universidade sira hanesan ita halo diseminasaun ba iha Universidade da Paz (UNPAZ), Dili Intitute of Tecnology (DIT) no Institute of Business (IOB),” Armando subliña.
Jornalista: Osória Marques
Editór: Xisto Freitas da Piedade
