OEKUSI, 29 Janeiru 2026 (TATOLI) – Autoridade Aduáneira (AA) apela ba sidadaun sira inkluzivemente setór privadu ne’ebé hala’o atividade ekonómika hanesan fa’an sasan sira iha loja no kioske sira atu kolabora no kumpre regra hodi importa sasán ho dalan legál.
“Ha’u hakarak informa ba públiku liuliu iha Oekusi tanba fronteira rai-maran luan teb-tebes. Hahú ohin ba oin, presu Cococola labele sentavu $,50 ona. Se Cocacola nia folin sentavu $,50, entaun ne’e konfirmadu katak tama husi dalan ilegál,” Komisáriu AA, Joanico Pinto hateten iha Oekusi, ohin.
Tanba Cocacola ida, nia esplika, simu tiha ona 5% husi nia folin produsaun ne’e. Normalmente Cocacola ida 720 mililitru, multiplika ba lata 24, depois sai nia totál vezes dolar $3 kada litru, signifika minímu liu Cocacola ida, nia tenke fa’an dolar $2,50 sentavu, se loja balun fa’an dolar $1,80 sentavu, ne’e nia lukru laiha.
“Ha’u atu dehan ida-ne’e, tanba iha rai-boot Dili, balun ami halo atuasaun, sira dehan tanba saida mak, Alfándega hatene, katak ne’e ilegál, tanba ami hatene husi presu. Se presu ida sentru $0,50 konfirmadu ilegál,” nia dehan.
Notísia relevante:Alfándega lansa sistema Asycuda World dijitaliza atendimentu iha fronteira Oekusi
Tanba ne’e, liuhusi momentu ne’e, nia apela ba setór privadu sira hotu iha Oekusi atu kolabora. “Ami fasilita imi. Dalan normál selu imi-nia obrigasaun ba Estadu, hanesan mós ami presta serbisu ba nasaun. Maibé, se ita-boot sira kontinua ida-ne’e, ami sei mai halo atuasaun, tanba ne’e husu ba ema hotu atu komprende situasaun ne’ebé ba kotuk, husik liu de’it, ita ko’alia ohin ba oin,” nia fó hanoin.
Jornalista: Abílio Elo Nini
Editór: Rafael Ximenes de A. Belo
