OEKUSI, 28 Janeiru 2026 (TATOLI) – Dijitaliza atendimentu públiku iha postu integradu fronteira Sakato no Oésilo iha Rejiaun Administrativa Espesiál Oekusi Ambeno (RAEOA), Autoridade Aduaneiru (AA) Alfándega, kuarta ne’e, ofisialmente, lansa sistema Asycuda World.
Komisáriu Alfándega Timor-Leste, Joanico Pinto, hateten, polítika ne’e orientasaun direta husi Primeiru-Ministru atu estabelese fila-fali sistema dijitalizasaun hodi garantia atendimentu públiku ho dignu no loos iha fronteira sira hodi habadak burokrasia ba prosesu importasaun no esportasaun.
Notísia relevante:Alfándega kapasita funsionáriu 72 iha Oekusi kona-ba sistema ASYCUDA World
Komisáriu ne’e, subliña iha tinan 10-resin ba kotuk, Alfándega iha Oekusi uza sistema ida-ne’ebé la eziste ona iha mundu Asycuda++, sistema ida-ne’e manuál mak barakliu, signifika atuasaun hotu ne’ebé halo iha Oekusi la kaer-metin ba padraun regra no prosedimentu ne’ebé nasaun iha.
“Tanba ne’e, ohin ita mai restaura fila-fali iha ne’e, hodi hatuur fila-fali ba nia fatin, atu dignifika ita-nia Estadu liuliu atu masimaliza kobransa sira no reseita ba ita-nia rai,” nia hateten iha salaun Alfándega Oekusi, ohin.
Ho nune’e, iha momentu di’ak ne’e, reprezenta Autoridade Aduaneiru nia naran, hato’o agradese profunda ba Autoridade RAEOA, tanba ho serbisu maka’as no serbisu ho fuan, kolabora ho Alfándega, atu ohin ita-bele lansa fila-fali sistema dijitalizadu ne’e iha Oekusi.
Tanba sistema Asycuda World ne’e, nu’udar plataforma ida-ne’ebé Governu deside hodi adota ihaTimor-Leste ba iha dijitalizasaun serbisu Alfándega nian
“Bainhira ita ko’alia ba sistema dijitál, ita bele evita risku barak, ne’ebé bele akontese iha serbisu lor-loron nian, evita ona ema lori osan selu ba malu, evita ona ema atu submete dokumentu ho kópia barak, sistema dijitalizasaun ne’e refleta ba prinsipíu no valór vizaun ne’ebé Álfandega iha, tanba vizaun Álfandega mak, fasilita komérsiu ida ho lais liu, justu no fasíl liu ba ema hotu, tanba ne’e ohin ba oin, temporariamente, sei uza iha postu integradu rua iha Oekusi ida iha postu integradu Sakato no ida iha postu integradu Oésilo,” nia afirma.
Notísia relevante:Rekursu umanu no materiál sai obstákulu ba serbisu Alfándega Oé-Cusse
Iha biban ne’e, Prezidente Autoridade RAEOA, Régio da Cruz Salu, rekomenda presiza tau importánsia ba dijitalizasaun sistema tanba iha Oekusi fronteira Terrestre luan no haleu direita husi nasaun viziña.
“Importante sei ita halo Oekusi nu’udar rejiaun ida-ne’ebé di’ak, ho free trade zone (zona komérsiu livre) atraídu. Ita labele uza beibeik sistema manuál, tanba investór ida kuandu atu mai investe iha ita-nia rai, atu uza aeroportu no portu sira labele ho atendimentu manuál. Ha’u konkorda sistema Asicuda World tenkiser aplika, se bele sistema iha Oekusi tenke di’akliu, konta nafatin Autoridade RAEOA, saida mak ami bele komplementa, nune’e sistema atendimentu iha fronteira Oekusi tenke di’akliu intermus aduáneira, tanba Oekusi hale’u husi fronteira nasaun viziñu,” nia hateten.
Notísia relevante:Alfándega no BNCTL introdús pagamentu eletróniku ba taxas aduaneira
Entretantu, hafoin lansa, komisáriu Alfándega konvida entidade hotu hala’o vizita ofisiál iha postu intergrade fronteira Sakato,s hodi observa atendimentu Alfándeganian ho sistema Asycuda Wolrd ne’ebé hahú aplika no mós esplika kona-ba prosesu oinsa utiliza sistema Asycuda World ne’e iha postu integradu sira.
Jornalista: Abílio Elo Nini
Editór: Rafael Ximenes de A. Belo
