OEKUSI, 11 Dezembru 2025 (TATOLI) – Autoridade Aduaneiru Alfándega (AA), kinta ne’e, realiza formasaun hodi kapasita funsionáriu na’in-72 iha Rejiaun Administrativa Espesiál Oekusi Ambeno (RAEOA) kona-ba modernizasaun sistema manuál ASYCUDA ++ ba ASYCUDA World.
Notísia relevante:Rekursu umanu no materiál sai obstákulu ba serbisu Alfándega Oé-Cusse
Diretór Autoridade Aduaneiru Oekusi, Alberto Seixas, esplika, objetivu husi formasaun ne’e hodi kapasita, hasa’e funsionáriu sira-nia koñesimentu, hodi transforma materia sira-ne’ebé nesesáriu liu-liu kódigu aduaneiru hanesan biblia matadalan ba funsionáriu sira.
“Formasaun ne’e atu moderniza sistema tuir padraun internasionál, ida-ne’e mak pontu prinsipál, tanba iha RAEOA ne’e sei uza sistema manuál ASYCUDA ++, maibé iha nasionál no postu sira seluk, uza ona sistema ASYCUDA World hanesan sistema avansadu, tan ne’e mak RAEOA mós fas parte hanesan nasionál, tenke uza sistema ida de’it, entaun modernizasaun ne’e atu uniformiza sistema kontrolu hanesan iha nasionál ne’ebé uza ona, bazeia ba padraun nasionál no intenasionál,” nia hateten iha salaun alfandega Oekusi, ohin.
Notísia relevante:Alfándega planu sosializa ba abitante Oésilo kona-ba utilizasaun postu integradu terrestre
Formasaun ne’e abertura husi Prezidente Autoridade RAEOA, Régio da Cruz Salu, hodi konsidera importante atu hasa’e koñesimentu ba funsionáriu sira hakna’ar an iha aduaneiru, nune’e bele serbisu ho profisionál hodi kontribui reseita ba kofre Estadu.
“Tanba RAEOA mai to’o autoridade atuál, ita-nia preokupasaun mak ne’e, ita-nia fonte reseita atu transforma ba potensia reseita ita hatene hela, maibé tenki la’o tuir sistema, ita bele dezenvolve maibé sistema ne’ebé atu hetan duni reseita ba kofre Estadu primeiru tama no sai husi fronteira, entaun ita-nia rekursu sira-ne’eb’e kolokadu iha liña fronteira liu-liu aduaneiru tenki fasilita bebeik formasaun ba sira, tanba área ne’e serbisu esensiál tebes tanba ita-nia fronteira sai no tama ne’e luan tebes, entaun presiza koloka ita-nia ema sira-ne’e ho kapasidade jestaun no kapasidade téknika ne’ebé aliña direitamente husi polítika aduaneiru nasionál no kontextu Oekusi nia lala’ok tuir kompeténsia lei númeru 3/2014,” nia hateten.
Notísia relevante:Postu integradu Oésilo presiza infraestrutura hodi fasilita servisu Migrasaun no Kuarentena
Entretantu, formasaun ne’e realiza durante semana ida, ho formandu 72 ne’ebé kolokadu iha fronteira haat, hanesan iha fronteira Sakato, Oésilo Pássabe no Nítibe.
Jornalista: Abílio Elo Nini
Editór: Rafael Ximenes de A. Belo
