OEKUSI, 16 Abríl 2025 (TATOLI) – Komisáriu Autoridade Aduaneira (AA) Alfándega, Joanico Pinto, relata katak iha tempu badak ekipa konjunta komposta husi Alfándega, Migrasaun no Kuarentena, hala’o sensibilizasaun atu hasa’e koñesimentu abitante sira hodi utiliza postu integradu iha liña fronteira Oésilo liuliu halo importasaun no esportasaun.
“Fronteira ne’e taka tinan neen ona, populasaun iha ne’e no hela baliza direita mai kedas ho Indonézia nian, ne’ebé iha tempu badak, ami hakarak halo sosializasaun ida kona-ba lei sira liuliu saida de’it mak lei permite atu bele lori ba importasaun no esportasaun no saida mak labele, atu sira bele komprende,” nia dehan iha Oekusi.
Notísia relevante:Timor-Leste no Indonézia reativa postu integradu terrestre iha Oésilo no PLBN Napan
Progama sosializasaun ne’e atu hasa’e koñesimentu komunidade sira iha liña fronteira liuliu labela exporta no importante sasan sira kontra bandu.
“ Ita tenke fó informasaun ba sira tanba ne’e mak ami servisu hamutuk no sei konsolida hodi organiza malu, ko’alia ho Prezidente Autoridade RAEOA, no administradór postu, xefe suku sira, atu halo divulgasaun ba populasaun sira iha Oésilo, hanesan mós antes ne’e ami hala’o ona iha Batugade no fatin seluk. Atu hatene hodi ema seluk uza sira nia ignoránsia hodi husu sira halo importasaun no exportasaun ba sasan sira kontra bandu,” nia dehan.
Notísia relevante:Lian komunidade ba reativasaun Postu Integradu Terrestre iha Oésilu no PLBN Napan
Hataan ba programa sosializasaun ne’e, Sekretáriu Rejionál ba Asuntu Administrasaun, Andre La’o, konsidera programa referidu importante, nune’e nia oriente xefe suku sira hodi organiza komunidade sira atu partisipa.
“Ha’u hanoin programa ne’e importante tanba atu limita movimentu ilegál nia impaktu ne’e oinsa kuandu hetan deteinsaun, ne’ebé autoridade koordena didi’ak asuntu ne’e, la’os ba Oésilo de’it, maibé ha’u sei husu xefe suku sira liuliu Pássabe ho Oésilo atu mobiliza komunidade sira, joven feto no mane atu partisipa másima tanba durante ne’e ita-nia kazu kontra-bandu mós rejista maka’as husi parte PNTL nian,” nia promete.
Notísia relevante:Postu integradu Oésilo presiza infraestrutura hodi fasilita servisu Migrasaun no Kuarentena
Jornalista: Abílio Elo Nini
Editór: Florencio Miranda Ximenes
