OEKUSI, 11 Abríl 2025 (TATOLI)—Komunidade iha liña fronteira Oésilu Rejiaun Administrativa Espesiál Oekusi Ambenu (RAEOA) no husi Napan Distritu Timur Tengah Utara (TTU), hato’o agradesimentu ba Governu Timor-Leste no Indonézia tanba tinan ne’e reativa hikas postu integradu Oésilu ho Pos Lintas Batas Negara (PLBN) Napan, hodi fasilita movimentu komunidade tama-sai no fasilita mós atividade importasaun no esportasaun.
Notísia relevante:Timor-Leste no Indonézia reativa postu integradu terrestre iha Oésilu no PLBN Napan
Abitante Joana Bobo, husi Suku Bobometo, Oekusi: “Ohin ita haree reprezentante suku 18 partisipa atu sai sasin iha reativasaun fronteira Oésilu ho Napan ne’ebé durante ne’e taka hela. Antes ne’e ami atu bá sorin akontese barak liu tama tuir dalan ilegál, entaun kontra fali lei kontra-bandu nian no mosu fali krime. Tan ne’e, ami agradese liuliu ami komunidade hela besik fronteira tanba ohin bá oin ami bele asesu besik, kompara ho distánsia dook ba to’o Sakatu mak foin bele sai bá sorin kuandu asuntu família ka nesesidade seluk tan”.
Cristovorus Abi, husi Distritu Timur Tengah Utara (TTU): “Ha’u hanoin ida-ne’e hanesan bensaun ida-ne’ebé mak estraordináriu ba komunidade TTU no Oekusi. Horisehik iha eventu tradisionál ida, ami-nia komunidade husi Oésilu, ami kontente tebes, tanba momentu ne’ebé mak ami hein. Ami lakon tebes postu kruzamentu ida-ne’e atu loke filafali, tanba to’o agora ami hakarak atu halo interasaun ho ami-nia maun-alin sira iha TTU ka sira iha NTT, iha jerál, ami iha difikuldade sira, atu liuhusi postu Wini ne’ebé dook, maibé se loke Napan, entaun ida-ne’e sei fásil liubá ami tanba besik”.
Notísia relevante:UPF-TNI halo kooperasaun servisu hodi kontrola fronteira
Abitante husi Napan, Indonézia, Agustinha Tani: “Ohin ami orgullu no hakarak hato’o agradesimentu ba Governu Timor-Leste no Indonézia, tanba tinan neen ona fronteira ne’e taka, iha-ne’ebé difikulta tebes ami atu sai bá Timor-Leste, tanba ami-nia família mós iha sorin, entaun ho reativasaun ne’e, responde ona ami-nia preokupasaun durante ne’e”.
Marcos Soni husi Suku Bobometo Oésilu: “Nu’udár Oésilu-oan, rona kontente tebes ba reativasaun fornteira ne’e. Fronteira ne’e taka kle’ur ona, ami atu sai bá vizita família ka lia-mate no lia-moris iha sorin, tenke liu fali husi Sakatu”.
Notísia relevante:RAEOA lansa postu integradu Oésilu hodi hasa’e kresimentu ekonomia fronteira
Entretantu, iha loron 10 Abríl ne’e, Governu Timor-Leste liuhusi Prezidente Autoridade Rejiaun Adminsitrativa Espesiál Oekusi Ambenu
(RAEOA), Rogério Tiago Lobato hamutuk ho Vise-Governadór Nusa Tenggara Timur (NTT), Johni Asadoma, ofisialmente reativa hikas atendimentu iha fronteira Postu Integradu Oésilu ho Pos Linta Batas Negara (PLBN-sigla Indonézia) Napan Distritu Timur Tengah Utara (TTU) hodi fasilita movimentu komunidade tama-sai no fasilita mós atividade importasaun no esportasaun.
Seremónia reativasaun ne’e hahú ho misa agradesimentu tanba Postu Integradu Oésilu ho PLBN Napan, Governu nasaun rua deside taka kuaze tinan neen ona, hahú iha 2019 tanba impaktu husi pandemia COVID-19.
Jornalista: Abílio Elo Nini
Editor: Evaristo Soares Martins
