DILI, 29 Janeiru 2026 (TATOLI)—Komisaun Rekrutamentu ba Juíz ne’ebé atu haknaar-an iha Supremu Tribunál Justisa (STJ) daudaun ne’e hahú halo ona serbisu hafoin Prezidente Repúblika (PR), José Ramos-Horta nomea tiha Avelino Coelho nu’udar Prezidente ba komisaun.
Komisáriu Pedro Camões, hateten, hafoin Xefe Estadu fó sai tia nia naran, nune’e desde loron 09 Janeiru 2026 komisaun ne’e halo kedan serbisu.
“Ami halo ona serbisu no aprova ami-nia rejimentu, depois dokumentu sira atu avalia ba futuru preparasaun atu simu ekipa juri no diskute matéria sira ne’ebé atu halo avaliasaun ba kandidatu juíz sira. Reuniaun ne’e ami halo dala hira ona, horisehik lorokraik ami reuniaun tan no rejimentu aprova ona, proposta ruma husi Komisáriu sira mai ami diskute depois mak aprova,” Komisáriu hato’o ba Jornalista sira iha Tribunál Judisiál Primeira Instánsia Dili (TJPID), iha Kaikoli, Kinta ne’e.
Notísia relevante : Prezidente Ramos-Horta nomea Avelino Coelho prezide Komisaun Rekrutamentu ba Juíz STJ
Komisaun ba Rekrutamentu ne’e kompostu husi ema na’in-tolu, ne’ebé na’in-ida husi Prezidente Repúblika mak nomea no seluk Parlamentu Nasionál mak nomea.
“Iha Komisáriu mak ami na’in-tolu ne’e depois mak ami hetan apoiu husi Parlamentu na’in-rua ou na’in-tolu, rekruta tan ema balun iha futuru, aban bainrua nia alista reuniaun no anota reuniaun, depois iha karta ruma karik iha ne’ebá bele apoiu,” nia akresenta.
Komisáriu Pedro Comões, hateten, sira na’in-tolu halo serbisu sériu tebes tanba ne’e buat hotu sei la’o tuir nia tempu.
“Buat hotu ne’e kuandu aprova, entaun rekrutamentu ne’e la’o iha Fulan-Maiu sira, se dezafiu laiha, se iha problema ruma posível ami sei estende tan serbisu,” nia katak.
Komisaun sei anunsia vaga ba juri rekrutamentu nia iha Fevereiru no juri sei halo nia serbisu iha Marsu.
“Juri ne’e bele mai husi Timor, Portugál, no Brazil. Vaga juri ba Rekrutamentu Juíz ne’e Komisáriu mak loke, ekipa juri tenke ema ne’ebé mak mais esperiénsia, se mais esperiénsia ita bele inklui mós timoroan,” nia tenik.
Kritériu ba ekipa juri, mínimu tenke serbisu iha Juíz durante tinan 25, tanba ne’e ba sira ne’ebé serbisu tinan 25 hanaran jubiliárius.
“Sira ne’e mak aban bainrua hola parte iha ekipa juri depois loke vaga sira ne’e, la’ós ida de’it, rua no tolu sira kompleta ona juri sira ne’e mak sei halo ezame, halo entrevista, hotu mak nia rezultadu fó mai Komisáriu,” nia dehan.
Ekipa juri sei halo Rekrutamentu ba Juís sira ne’ebé atu halo funsaun iha STJ no Tribunál segunda Instánsia.
Ekipa juri ne’e nia serbisu atu simu dokumentu husi konkorrente timoroan sira ne’ebé mak interresadu ba vaga sira iha Tribunál Supremu nomós Tribunal Rekursu.
Camões hateten ba juís sira ne’ebé atu konkorre ba vaga iha Supremu Tribunál no Tribunál Rekursu nia kritériu mak tenke sidadaun timoroan.
“Ha’u bele dehan sira mais 10 anos esperiénsia iha Timor akadémiku, ba Defensór Públika no majistradu,” nia informa.
Prezidente Repúblika iha espetativa katrak sedu liu iha Maiu 2026, bele hahú instalasaun Supremu Tribunál Justisa no iha Novembru tinan ne’e bele instaladu ona.
“Ami Komisaun esforsu hela, hein reuniaun parese finde Janeiru ne’e regra sira ne’e aprovadu no rekezitu sira ne’e mós aprovadu, nune’e iha Fevereiru ita halo anúnsia ba vaga juri rekrutamentu nian no Marsu juri bele halo nia serbisu ona,” nia informa.
Jornalista : Natalino Costa
Editora : Julia Chatarinaa
