DILI, 29 Janeiru 2026 (TATOLI)-Ministériu Edukasaun (ME), liuhusi Sekretáriu Estadu Ensinu Sekundáriu Jerál no Tékniku Vokasionál, Domingos Lopes Lemos, klarifika desizaun ministériu nian hodi taka klase paralela ualu ba Parlamentu Nasionál.
Klase paralela ualu ne’e mak Kilik Uaegae-Baukau, Boaua Lavateri, Baguia-Baukau, 1912 Fahi Nehan-Manufahi, Babulo-Manufahi, Fernando Lasama-Manufahi, Fleixa-Manufahi, Olakasa Uaegae, Ossú-Vikeke, no Ponilala-Ermera.
Domingos Lemos esplika katak, tuir diploma ministeriál ne’ebé hasai iha tinan kotuk fó limitasaun no observasaun direta ba klase paralela sira ne’ebé eziste no halo mudansa ruma no sira ne’ebé la prienxe rekizitu elimina tiha.
Tanba ne’e, ME liuhusi diresaun tékniku vokasionál halo avaliasaun rigoroza ba klase paralela ualu ne’ebé la prienxe rekizitu no ikus mai suspende tiha prosesu matrikulasaun ba désimu anu ka rejistasaun ba klase 10 iha ensinu sekundáriu no tékniku vokasionál.
Notísia relevante: ME klarifika taka klase paralela Ensinu Sekundáriu Uagia
Klase paralela sira ne’e la prienxe rekizitu, tanba totál estudante maioria la to’o 150, tanba tuir regra normál ne’ebé iha husi désimu anu ba ensinu sekundáriu. Maksi klase paralela iha Ponilala nian prienxe rekizitu, maibé labele kontinua tanba eskola rua mak viziña ho distánsia ne’ebé besik, entaun suspende.
“Ita la taka eskola, maibé klase ne’e mak ita taka, tanba bainhira eziste nafatin, kada klase tenke presiza profesór dixiplina na’in-14 to’o 17. Ne’e sai preokupasaun boot ho estudante ne’ebé ki’ikoan. Tuir karga orária ne’ebé kurríkulu iha, kada profesór ida hanorin oras 24 iha kada semana”, dehan.
Iha parte seluk, Sekretáriu Estadu ne’e fó sai katak, desizaun ministériu nian hasa’e fali klase paralela 18 ba filiál iha territóriu no iha mós eskola tolu ne’ebé sai eskola sentrál hanesan Vemasse, Venilale, no Kelikai, iha munisípiu Baukau, tanba iha sira-nia estudante no jestaun di’ak.
Notísia relevante: https://tatoli.tl/2026/01/19/deputadu-preokupa-kona-ba-taka-eskola-paralela-neebe-afeta-ba-alunu-sira/
Jornalista: Nelson de Sousa
Editora: Maria Auxiliadora
