OEKUSI, 29 Janeiru 2026 (TATOLI) – Iha fulan-Janeiru 2026 ne’e, Sentru Saúde Kiumaonteko, lokaliza iha suku Costa sub-rejiaun Pante Makasar, Rejiaun Administrativa Espesiál Oekusi Ambeno (RAEOA) rejista pasiente 260 sofre moras ISPA (Infesaun Respiratória Aguda) no diarreia.
Notísia relevante:Autoridade RAEOA sei estebelese tán postu saúde ida iha aldeia Mahata
Xefe Sentru Saúde Kiumaonteko Anita da Cunha, informa, sentru saúde Kiumaonteko kada loron atende pasiente na’in-70 ba leten, maioria husi komunidade Costa inklui suku Lifau balun, enkuantu kona-ba kazu dengue, iha sentru saúde Kiumaonteko laiha.
“Maibé ami rejista kazu aas liu mak pasiente ho moras ISPA 200 no diarreia 60, husi kazu rua ne’e maioria akontese ba idade labarik sira, ba adultu númeru ki’ik,” nia hateten ba jornalista sira iha Oekusi, ohin.
Autoridade ne’e esplika, kazu husi kazu ne’e, tanba konsiénsia, daudaun ne’e tempu udan, labarik sira diarreia tanba dalaruma haris bee-udan no rai-tahu, dalaruma atu han, haluha fase liman, entaun kontribui ba kabun moras, no mós konsumu hahán, dalaruma laiha ijiéne ne’ebé di’ak, lalár hobur hahán sira mós kontribui ona.
“Ne’ebé husi kazu ne’e, ita atende sira ho di’ak, sempre fó motivasaun ba inan-inan bainhira sira lori mai konsulta, tanba ita laiha problema kona-ba ai-moruk, ita fasilita kontinua hemu tuir orientasaun ne’ebé dotor sira rekomenda,” nia hateten.
Notísia relevante:Sentru Saúde Kiomaonteko rejista pasiente ho kazu TBC 79
Maria Terezia Corbafo, hafoin konsulta nia oan ho kondisaun isin-manas, sente orgullu tanba hafoin konsulta hetan atendimentu di’ak no mensajen sira oinsá kuida labarik sira-nia saúde iha atividade loron-loron.
“Ha’u mai konsulta ha’u-nia oan isin manas loron rua ona, ne’e mak ohin ami konsulta iha ne’e, ne’ebé ami agradese tanba ohin husi dotor sira fó ami ai-moruk, no husu ami atu labele haris bee-udan no tenke haree labarik atu labele halimar beibeik rai-rahun; ida-ne’e de’it mak ohin sira hamenu mai ami,” nia haktuir.
Jornalista: Abílio Elo Nini
Editór: Rafael Ximenes de A. Belo
