KOVALIMA, 28 JANEIRU 2026 (TATOLI)-Xefe Suku Belekasak, postu administrativu Tilomar, munisípiu Kovalima, Leonito Gusmão, preokupa ho implementasaun programa merenda eskolár iha Kovalima maióra uza produtu importadu hosi rai-liúr.
“Ko’alia kona-bá implementasaun merenda eskolár di’ak maibé presiza atu hadia di’ak liután menu ai-han ne’ebé maka ita uza hela ba ita-nia oan sira konsumu iha kada eskola tanba la tuir menu durante ne’e implementa PME uza barak liu hahán importadu ,” nia hateten ba TATOLI, iha salaun AMC Kovalima, ohin.
Nune’e, lideransa komunitária ne’e rekomenda ba Ministériu Edukasaun no servisu edukasaun munisipál atu kontrola fornesimentu menu aihan ne’ebé maka kada eskola sira prepara hodi forñese ba estudante sira.
Adminsitradór Postu Administrativu Fatululik, Elias da Crúz, reforsa durante ne’e estudante sira la konsumu hahán hosi produtu lokál ne’ebé prodúz iha rai-laran maibé, nota aihán hirak ne’e maiória sosa hosi rai-liúr.
“Implementasaun Programa merenda eskolár la’o duni maibé ami observa katak alunu sira la han produtu lokál nune’e presiza atu hadia sistema nune’e fó oráriu nune’e ami bele halo kontrola,”nia hateten.
Hatan ba kestaun ne’e, Diretora Servisu Munisipál Edukasaun Kovalima, Elda de Fátima, rejeita informasaun ne’e tanba iha implementasaun programa merenda eskolár iha Kovalima pursentu 75 uza produtu lokál no produtu estranjeitu 25%.
“Ha’u kontra xefe suku Belekasak nia preokupasaun implementasaun PME uza hahan importadu ne’e laloos la’ós atu defende aan, merenda ne’e balun ita uza duni aihan importadu foos bainhira foos produtu lokál la sufisente tenke sosa iha loja , manu tolun ami hatene katak sosa iha Ermera, kona-bá ai-fuan pateka la to’o entaun sosa apel,” nia hateten.
Tuir polítika Prezidente Autoridade Kovalima nian iha tinan 2026, eskola idaidak maka sei halo jestaun ba programa merenda eskolár nune’e fasil atu halo kontrolu. Antes ne’e, ekipa jestaun programa (EJP) maka halo jestaun sempre failla atu submete relatóriu ezekusaun.
“Atu hadia di’ak liután maka ami fó fali eskola maka halo jestaun hodi garante polítika implementasaun PME hodi hadia di’ak liu nune’e ami sei buka grupu iha kada postu administrativu hodi suporta aihán lokál hodi forñese ba PME,”nia hateten.
Entertantu, total orsamentu ba programa merenda eskolár iha tinan 2026 nian servisu edukasaun munisipál Kovalima seidauk bele públika ba públiku tanba sei iha mudansa ba númeru benefisiáriu sira.
Jornalista: Celestina Teles
Editór: Florencio Miranda Ximenes
