BOBONARU, 29 Janeiru 2026 (TATOLI)-Diresaun Servisu Saúde Munisípiu Bobonaru rejista kazu dengue hamutuk 16 no maioria pasiente husi postu administrativu Maliana Vila.
Diretór Servisu Saúde Bobonaru, Gil Bernardo Vicente, informa katak moras ne’e afeta barak liu ba labarik idade tinan 15 mai kraik. “Iha janeiru ne’e, ita rejista totál kazu dengue 16 – Balibó ida, Bobonaru ida, Kailaku mós ida, barak liu iha Maliana ho totál 13”, nia ralata ba Tatoli, ohin.
Ba kestaun ne’e, ekipa saúde halo ona medida preventiva sira hanesan halo promosaun saúde, liuhusi avizu tama no sai bairru, fahe abate tau ba tanke hariis-fatin, halo fumigasaun ba fatin sira risku ba dengue.
Intervensaun ne’e atu hamate populasaun susuk Aedes Aegypti ka Aedes albopictus, nune’e labele tata no tranzmite moras ne’e ba ema seluk. “Ami husu ba komunidade atu halo limpeza iha idaidak nia uma-oin no uma-ninin, toba iha moskiteireu laran, hakoi kalen aat no botir mamuk sira, nune’e hamutuk prevene moras dengue”, dehan.
Notísia relevante: Janeiru 2026: Servisu Saúde Dili rejista kazu dengue hamutuk 223
Dengue mak moras ida neʼebé kauza husi infesaun husi vírus ne’ebé tranzmite liuhusi tata husi susuk Aedes Aegypti ka Aedes albopictus. Moras ida-ne’e dalabarak mosu iha área tropikál no subtropikál, inklui Timor-Leste.
Iha kazu grave, raan sai bele mosu husi inus, ibun-tutun, ka sai iha kulit. Nivel gravidade dengue bele dezenvolve ba dengue emorrájiku, ne’ebé bele sai fatál bainhira lahetan tratamentu kedas. Dengue grave bele kauza síndrome xoke, estragu ba órgaun sira no raan sai maka’as.
Notísia relevante: Sentru Saúde Komunitária Bobonaru deteta kazu dengue ida
Jornalista: Sergio da Cruz
Editora: Maria Auxiliadora
