Servisu Saúde Kovalima rejista pasiente dengue na’in-16
KOVALIMA, 29 Janeiru 2026, ( TATOLI) – Servisu Saúde Munisipál (SSM) Kovalima, daudaun-ne’e rejista pasiente moras dengue hamutuk na’in-16 ne’ebé mai husi postu Administrativu Fatululik, Suai no Maucatar, iha munisípiu Kovalima.
“Daudaun ne’e, Servisu saúde munisípiu Kovalima rejista pasiente moras dengue hamutuk na’in-16 ne’ebé mai husi postu Administrativu Fatululik, Maucatar no Suai iha munisípiu Kovalima”, Xefe Departamentu Programátiku Servisu Saúde Munisípiu Kovalima, Rui Amaral, relata ba TATOLI, iha Ladi-Suai Villa, ohin.
Xefe programa ne’e informa relasiona rejistu kazu dengue, husi Servisu Saúde Kovalima halo ona intervensaun hodi rega susuk no distribui ai-moruk abate,durante semana rua no mós partilla informasaun oinsá atu prevene moras dengue.
Pasiente na’in-16 moras dengue ne’e baixa iha ospitál referál Suai ne’ebé balun fila ona ba uma no balun seidauk kontinua baixa iha ospitál referál Suai, nune’e médiku kontinua halo tratamentu.
“Kazu dengue ne’ebé mak ami rejista entaun ami tenke partilla informasaun ba komunidade no mós distribui ai-moruk abate, nune’e bele halakon susuk ne’ebé mak lori moras ba sidadaun sira no mós pesoál saúde sira halo limpeza iha Suai Loro. Mekanizmu partilla informasaun ba komunidade sira ne’e liuhusi fó sai avizu tama sai aldeia no suku sira”, nia dehan.
Sintoma husi moras sengue mak hanesan ulun moras grave, moras iha matan laran, moras grave iha uat ho ligasaun no laran sa’e no sitoma sira seluk mak hanesan kabun moras, muta raan.
Notisia relevante: MS rejista kazu dengue 1.002 iha Janeiru no intensifika medida prevensaun
Jornalista: Celestina Teles
Editór: Florencio Miranda Ximenes
