DILI, 29 Janeiru 2026 (TATOLI)–Primeiru-Ministru, Kay Rala Xanana Gusmão, hateten aban sei iha reuniaun Konsellu Ministru estraordináriu diskute ajenda importante rua ne’ebé foku de’it ba Reziaun Administrativa Oekusi Ambenu (RAEOA).
“Aban, sei iha Konsellu Ministru estraordinariu, maibé foku liu ba Reziaun Administrativa Oekusi Ambenu, tanba uluk sai tiha ZEESM maibé planu nunka mosu. Sé mak uluk kaer iha ne’ebá nia mak manda, entaun foin lalais ba iha ne’ebá ajuda sira atu kurize tanba ita atu tama ba desentralizasaun podér lokál,” PM Xanana hateten ba jornalista sira iha Palásiu Prezidensiál Nicolau Lobato, Bairru Pite, ohin.
Nia dehan, RAEOA atrazadu liu munisípiu sira seluk, ho nune’e aban iha Konsellu Ministru haree atu fó pedidu tranzisaun tinan ida atu bele fó apoiu ba Oekusi-oan sira hodi dezenvolve sira-nia rain.
“Entaun, aban loraik iha Konsellu Ministru, ami sei halo aprovasaun ba Dekretu-Lei rua ne’ebé sei haruka mai Prezidente Repúblika atu promulga, atu nune’e bele funsiona iha loron 01 fulan-Fevereiru. Kona-ba RAEOA, ita atu temi munisípiu maibé la munisípiu tanba sira enklave ida, iha situasaun ne’ebé la hanesan ho ita-nia munisípiu sira, maibé estrutura ne’ebé atu kria ne’e tenke hanesan ho munisípiu sira seluk maibé ZEEMS buat ketak,” nia hateten.
Jornalista : Hortencio Sanchez
Editór : Cancio Ximenes
