DILI, 10 Abríl 2026 (TATOLI)—Prezidente Repúblika, José Ramos-Horta, promulga ona Lei númeru 19/VI (2a)-Lei Konkorrénsia ne’ebé TATOLI asesu husi Jornál Repúblika, sesta ne’e.
Notísia Relevante: Proposta Lei Konkorrénsia aprova iha finál globál
Rekorda fali katak, Lei ne’e aprezenta antes ne’e husi Governu liuhusi Ministru Komérsiu no Indústria (MKI), Filipus Nino Pereira, hodi aprezenta ba Parlamentu Nasionál halo diskusaun no pasa, nune’e submete kedan ba Prezidente Repúblika hetan ona aprovasaun ikus.
Lei ida-ne’e reprezenta pasu estratéjiku ba Timor-Leste hodi fortalese seguransa jurídika, aumenta konfiansa investidór sira no promove ambiente negósiu ne’ebé saudavel no kompetitivu.
Proposta-lei ne’e klaru proíbe prátika anti-konkorrensiál hanesan akordu orizontál hodi fiksa folin iha merkadu, prátika vertikál ne’ebé limita kompetisaun no abuzu ba pozisaun dominante iha merkadu.
Lei ne’e estabelese ho rigoroza kontrolu ba konsentrasaun sira hanesan akizisaun ba empreza sira, liuliu iha setór ne’ebé estratéjiku hanesan enerjia, transporte, finansa no telekomunikasaun.
Lei ne’e mós importante atu kumpre padraun internasionál ne’ebé relevante ba Timor-Leste nia adezaun ba Organizasaun Mundiál Komérsiu (OMK) no integrasaun iha Asosiasaun Nasaun Sudeste Aziátiku (ASEAN, sigla inglés).
Lei ne’e la pertense ba Governu de’it, maibé instrumentu Estadu nian ba povu tomak. Ho lei ida-ne’e harii fundasaun ba futuru ida ne’ebé ekonomia Timor-Leste nian bele buras ho sustentavel, justu no kompetitivu.
Jornalista : Hortêncio Sanchez
Editór : Cancio Ximenes
