KOVALIMA, 30 Janeiru 2026 ( TATOLI) – Administradór Postu Administrativu Suai, Idelfonso Maria Amaral, husu atu fasilita formasaun no apoia pulsa internet ba ofisiál suku sira atu update dadus demografia no monografia iha sistema integrádu Jestaun Dadus Suku no Aldeia (sígla-Portugés SIIGASA).
“ Ha’u hakarak rekomenda de’it katak ita presiza fasilita formasaun espesifiku ba ofisiál suku sira atu nune’e sira bele intende didi’ak hodi prenxe livru 18 no ita presiza mós apoiu pulsa internet, nune’e bele fasilita sira hodi hala’o sira-nia servisu ho di’ak,” APA Suai ne’e hato’o iha Salaun AMC, ohin.
Razaun presiza apoia pulsa internet tanba ofisiál suku nia servisu ne’e ligasaun ho internet hodi updade dadus demografia no monografia bainhira rede internet la di’ak oinsá mak bele fasilita sira atu presta sira-nia servisu.
Hatan ba kestaun ne, Prezidente Autoridade Munisípiu Kovalima, Miguel Armada Cardoso, konsidera importante duni atu apoia pulsa ba ofisiál suku sira, nune’e bele update dadus monografia ho demografia ho di’ak.
“ Ita toma nota atu apoia pulsa ba ofisial suku tanba sira-nia insentivu ki’ik, nune’e laiha osan atu sosa pulsa,”nia afirma.
Autoridade Kovalima mós husu ba Administradór Postu Administrativu no Xefe Suku sira atu kontrola funsionáriu ofisiál suku hodi prenxe livru 18 iha portal munisipál.
“Update dadus monografia la’o ladun di’ak administradór postu administrativu-sira no xefe suku iha ita boot sira nia liman, tanba iha ona funsionáriu na’in-haat atu update dadus loro-loron hodi prenxe livru 18,” PAM sujere.
Notisia relevante:Autoridade lokál: SMAOGOK monitoriza ofisiál suku no avaliasaun husi xefe suku
Jornalista: Celestina Teles
Editór: Florencio Miranda Ximenes
