VIKEKE, 30 Janeiru 2026 (TATOLI)–Xefe Suku Matahohi, Postu Administrativu Uatulari, Munisípiu Vikeke, António Amaral informa Eletrisidade de Timor-Leste, Empreza Públika (EDTL, E.P.) distribui ona fiu eletrisidade ba Projetu Komunitária Eletrisidade (PKE) ne’ebé implementa iha Aldeia Loko-Loko, Suku Matahoi.
“Kona-ba preokupasaun husi populasaun Aldeia Loko-Loko, EDTL iha Tersa liubá (27/01) ne’e, distribui ona fiu eletrisidade mai Postu Uatulari no lori direta ona bá Aldeia Loko-Loko. Populasaun hein halo serbisu dada fiu eletrisidade,” António Amaral ba TATOLI iha Postu Administrativu Uatulari, Sesta ne’e.
Nia haktuir seidauk bele dada eletrisidade tanba EDTL sei halo kontratu ho grupu tékniku hodi dada.
Notísia relevante: Populasaun Loko-Loko ejize EDTL konklui obra PKE iha Suku Matahoi
“Agora seidauk dada tanba EDTL sei halo kontratu ho ema na’in-sanulu (10) hanesan ne’e mak foin sira bá dada fiu husi Uatulari Antiga bá Loko-Loko,” António hatutan.
Iha fatin ketak, reprezentante EDTL, E. P. Postu Administrativu Uatulari, Felisano Almeida haktuir EDTL distribui ona materiál eletrisidade to’o iha área Loko-Loko.
“Sasán sira-ne’ebé uza ba obra PKE daudaun ne’e iha hotu ona Aldeia Loko-Loko hanesan fiu eletrisidade metru 4.000-resin, TR 7.000-resin inklui asesória eletrsidade sira seluk. Hein EDTL halo kontratu ba ekipa PKE hodi hamutuk ho komunidade mak monta fiu sira-ne’e. Tempu badak ne’e ita-nia komunidade bele asesu ona eletrisidade,” nia hato’o.
Entretantu, obra PKE ne’e konklui sei befínisia ba populasaun husi aldeia Loko-Loko ho totál hamutuk na’in-126 no totál uma-kain hamutuk 64 ne’ebé daudaun ne’e hela iha aldeia Loko-Loko.
Jornalista: Vitorino Lopes da Costa
Editór: Xisto Freitas da Piedade
