DILI, 30 Janeiru 2026 (TATOLI)—Embaixadór foun Japaun ba Timor-Leste, Yasushi Yamamoto, komprometidu iha ninia mandatu sei servisu maka’as hodi promove relasaun bilaterál ho di’ak entre Timor-Leste ho Japaun.
“Ha’u ohin hasoru malu ho Primeiru-Ministru, Kay Rala Xanana Gusmão, hanesan oportunidade di’ak loos hodi ko’alia ho nia no iha biban ne’e, nia mós introdus kona-ba ninia relasaun di’ak loos ho polítiku japonezes,” Embaixadór Japaun ne’e informa ba Jornalista sira, hafoin ramata enkontru ho Primeiru-Ministru iha Palásiu Governu, ohin.
Nia dehan, Primeiru-Ministru mós enkoraza hodi husu nia atu servisu ho di’ak atu dezenvolve relasaun bilateral entre Timor-Leste no Japaun.
“Ha’u promete atu servisu no fahe ha’u-nia esperensia di’ak liu iha futuru oin mai,” nia hateten.
Nia hateten, iha ninia mandatu ne’e nia sei fó kontribuisaun servisu hamutuk iha área barak inklui área médika, infrastrutura, agrikultura, edukasaun, kooperasaun boot loos iha ne’e, aleinde iha asisténsia dezenvolvimentu ofisiál, maibé mós ba investimentu privadu inklui hanesan empreza konstrusaun ró.
Jornalista : Alexandra da Costa
Editór : Cancio Ximenes
