DILI, 30 Janeiru 2026 (TATOLI)—Antigu Ministru Agrikultura no Peska (MAP), Estanislau Aleixo da Silva, sesta ne’e, hasoru malu ho Primeiru-Ministru, Kay Rala Xanana Gusmão, iha Palásiu Governu Dili.
Antigu Membru Governu, Estanislau Aleixo da Silva, hateten hasoru malu ho Primeiru-Ministru Xanana Gusmão ne’e laiha intensaun atu husu pozisaun responsabilidade (kargu) ba Governu, maibbé internalmente hanesan kolega no timoroan ne’ebé atu fó kontinuidade ideia ba malu hodi fó kontribuisaun atu dezenvolve rai ida-ne’e.
“Ha’u hanesan ema sivíl la’ós lori partidu FRETILIN nia naran. Ha’u mai hasoru Xanana la’ós atu husu pozisaun ida ba Governu, tanba buat ida responsabilidade konstitusionál ne’e depende ba eleisaun,” Antigu Ministru Agrikultura no Peska (MAP), Estanislau Aleixo da Silva, hateten ba jornalista sira iha Palásiu Governu, ohin.
Tanba, nia dehan, durante ne’e nia mós asume ona kargu hanesan membru Governu iha Governu anteriór, nune’e nia mós lahatene prezensa ninian liga ho isu remodelasaun ne’e lae, tanba ne’e la’ós ninia kompeténsia atu ko’alia kona-ba asuntu ida-ne’e.
Iha biban ne’e mós, hanesan antigu Ministru Agrikultura no Peska (MAP) husu ba Governu atu tau-matan ba setór agrikultura tanba setór ne’e produtivu bele fó kontribuisaun ekonómika.
“Liuliu tau matan ba área peska nian, tanba durante ne’e kuaze abandona loos. Ema na’ok ita-nia ikan sira iha tasi laran, entaun presiza iha kontrolasaun. Maibé, ne’e depende ba ida-idak nia responsabilidade, ha’u labele ko’alia to’o ne’ebá. Karik, tuir observasaun sivíl sidadaun ne’e bele,” nia dehan.
Jornalista : Alexandra da Costa
Editór : Cancio Ximenes
