VIKEKE, 30 Janeiru 2026 (TATOLI)–Vise Diretór Fundasaun HAK, António de Lima hateten dezenvolvimentu infraestrutura (estrada) iha kapitál Munisípiu Vikeke sei hakadasak hela.
“Ita haree dezenvolvimentu iha Munisípiu Vikeke la’o tarde loos kompara ho munisípiu seluk. Keta ita-nia maluk sira ladún ko’alia barak karik? Tanba ne’e mak dezenvovimentu la’o hakdasak nune’e. Tanba iha fatin balun ema hakilar barak, halo Governu sentral hakfodak hodi tau-matan ba infraestura,” António de Lima ba jornalista sira iha postu Vikeke Vila, Tersa (27/01).
António aprofunda estrada iha Vikeke Vila laran kuaze tinan sanulu (10)-resin ona, maibé rai rahun suar nafatin hodi difikulta movimentu sira iha Munisípiu Vikeke.
Notísia relevante: https://tatoli.tl/2025/07/23/tempu-badak-mop-sei-reabilita-estrada-kapital-vikeke-kilometru-haat/
“Problema sira-ne’ebé iha ita hamutuk ko’alia nafatin. HAK la hateten ita-nia Governu halo buat sala ne’e la’e. Ita tau hanoin hamutuk oinsá ko’alia di’ak ba Governu dezenvolve ita-nia rai,” nia hato’o.
Iha fatin hanesan, Xefe Suku Bibileo, Postu Vikeke Vila, Moises A. D. C. Pinto, husu Governu hadi’a estrada liga iha kapitál Munisípiu Vikeke ne’ebé tempu udan tahu nakonu iha estrada laran hodi difikulta movimentu transporte no ema la’o-ain sira.
“Durante ne’e sempre promete halo estrada, maibé to’o agora seidauk hadi’a estrada sira iha Vila laran. Tan ne’e, ha’u husu Governante sira presiza servisu ho seriedade hodi hadi’a estrada sira, atu povu asesu. Ita haree dalabarak tékniku sira tun beibeik observa estrada sira, maibé to’o agora la hadi’a nafatin,” nia hato’o.
Iha sorin seluk, Sekretáriu Asuntu Sosiál no Organizasaun Komunitária Munisípiu Vikeke, Acasio de Sousa hateten, kona-ba infraestrutura estrada sira, daudaun ne’e Governu implementa iha Munisípiu Vikeke mak hanesan ponte Uelolo, Suku Luka, estrada liga bá Postu Lakluta agora empreza sira kontinua servisu.
“Ha’u fiar katak tempu badak Governu hadi’a estrada sira iha Munisípiu Vikeke. Tanba tinan ida-ne’e tinan dezenvolvimentu, ne’ebé ita hein Governu implementa infraestrutura estrada sira iha munisípiu ida-ne’e,” nia tenik.
Entretantu, Diretór Servisu Ministériu Obra Públika (SMOP) unisípiu Vikeke, Casildo Gomes Soares hateten, kona-ba obra reabilita estrada kapitál Vikeke kilómetru haat ne’e loloos implementa ona, maibé iha estrada parte ba Sentru Saúde Vikeke Vila nian mak iha mudansa dezeñu tanba ne’e mak seidauk implementa.
“Tuir loloos ne’e ita-nia estrada urbana Vikeke Vila laran ne’e implementa ona, maibé mudansa dezeñu no mundansa Bill of Quantities (BoQ), ho razaun estrada área Lugatohi ne’ebé daudaun ita uza ne’e monu beibeik, entaun ita deside atu liuhusi fali okos ne’ebé daudaun ne’e tau ona bronjong. Husi ne’e bá mosu iha ofisina no afastamentu nian kauze metru 100-resin. Tan ida-ne’e mak agora parte nasionál sira sei prosesa hela. Ha’u mós tenta beibeik parte nasionál. Bainhira prosesu sira-ne’e finaliza ona, parte nasionál sei informa fali ba ita,” nia subliña.
Jornalista: Vitorino Lopes da Costa
Editór: Xisto Freitas da Piedade
