DILI, 30 Janeiru 2026 (TATOLI)—Governu liuhusi reuniaun Konsellu Ministru, sesta ne’e, aprova proposta rua ne’ebé aprezenta husi Ministru Defeza, Donaciano do Rosário Gomes, kona-ba estende mandatu ba ofisiál jenerál FALINTIL-Forsa Defeza Timor-Leste ne’ebé kategória idade reforma.
Ministru Defeza, Kontra Almirante Donaciano do Rosário da Costa Gomes, hateten ohin iha dekretu-lei ida no rezolusaun lei ida mak aprova ne’ebé mak ko’alia kona-ba estensaun mandatu jerál esepsionál nian to’o tinan oin atu sira bele kompleta sira-nia mandatu iha ámbitu pertense hotu iha idade reforma, maibé tanba presiza sira-nia partisipasaun dezenvolvimentu ba forsa entaun estende tan tinan ida ba sira-nia mandatu.
“Tanba ne’e militares hotu-hotu ne’ebé mak kategória idade reforma, ohin ita halo lista ba militares ne’ebé pasa ba rezerva no pasa ba reforma,” Ministru Defeza Donaciano informa ba jornalista sira iha Palásiu Governu ohin.
Bazeia ba dekretu-lei ida-ne’e define katak exesionál, suspensaun ba limite idade reforma nian ba ofisiál jenerál atuál sira-ne’ebé okupa kargu Xefe Estadu-Maiór-Jenerál Forsa Armada (CEMGFA, sigla iha lian portugés), Vise-Xefe Estadu-Maiór-Jenerál Forsa Armada (CEMGFA, sigla iha lian portugés), no Xefe Estadu-Maiór Forsa Armada (CEMFA, sigla iha lian portugés).
Liuhusi diploma ida-ne’e, Governu Konstitusionál (IX) rekoñese nesesidade, ho exesionál, atu garante permanénsia atuál titulár kargu CEMGFA, Vice-CEMGFA no CEMFA to’o ramata sira-nia mandatu, permite tranzisaun neʼebé nesesáriu ba lideransa iha futuru, valoriza esperiénsia husi komandante atuál sira no evita ruturas abruptas (mudansa sira-neʼebé mosu derrepente).
Nune’e mós rezolusaun Governu nian, ne’ebé aprezenta mós hosi Ministru Defeza, ne’ebé ratifika lista militár sira-ne’ebé, iha loron 31 fulan-Dezembru tinan 2025, sei halo tranzisaun ba estatutu rezerva no lista militár veteranu sira-ne’ebé sei reforma.
Desizaun ida-ne’e kumpre rejime jurídiku ne’ebé aplikavel ba karreira militár sira, liuliu Estatutu Militár FALINTIL-Forsa Defeza Timor-Leste (F-FDTL) no Dekretu-Lei númeru 8/2025, neʼebé garante regularizasaun administrativa kona-ba tranzisaun ba rezerva no reforma ba militár sira-ne’ebé atinje ona limite idade legál ka kumpre kondisaun sira-ne’ebé lei regula.
Aprovasaun ba rezolusaun ida-ne’e ho objetivu mós atu garante prosesu reforma ida-ne’ebé justu no dignu ba veteranu sira, tuir objetivu neʼebé define ona husi Programa Governu Konstitusionál IX ba área Defeza.
Jornalista : Alexandra da Costa
Editór : Cancio Ximenes
