DILI, 30 Janeiru 2026 (TATOLI)—Komunidade Kongregasaun Saleziana Don Bosco (SDB) konsidera maktoban Padre Énio Romalho Esteves, SDB, nu’udár misionáriu ne’ebé auténtiku servidór Kristu ne’ebé nakonu ho hamnasa no haraik an.
Provinsiál Salezianu Don Bosco (SDB) Timor-Leste, Pe. Anacleto Guterres Pires, SDB, esplika sasin ida-ne’e fó-sai husi Padre Provinsiál Salezianu Ekuadór ne’ebé fó-sasin ka testemuña kona-ba Padre Énio ne’ebé konsideradu saserdote misionáriu auténtiku servidór ba Kristu katak halo misaun tuir Kristu no servidór ho ontentisidade iha-ne’ebé hala’o serbisu ho fuan no laran.
“Amu Énio nia naran, ksolok no alegria hakerek hela iha sarani sira Ekuadór nia fuan. Umanamente Amu Énio nu’udár Amu ne’ebé umilde, fásil halo diálogu no haraik-an tebetebes,” Padre Anacleto hateten iha Igreja Parókia Maria Auxiliadora Komoro, Kinta ne’e.
Notísia relevante:Kongregasaun Saleziana selebra misa requiem ba Padre Énio Esteves, SDB
Padre Anacleto Pires relata Kongregasaun Saleziana Ekuadór hamutuk ho Salezianu Timor-Leste sente lakon Padre Énio Esteves ne’ebé konsideradu nu’udár misionáriu ne’ebé auténtiku tanba mezmu situasaun difísil maibé maktoban nafatin hala’o misaun ho alegria no hamnasa.
Aleinde ne’e, Padre Énio iha vokasaun ba misionáriu, salezianu no saserdote nune’e lori maktoban ba hala’o misaun iha Ekuadór mezmu hasoru situasaun difísil maibé kontinua hala’o kna’ar liuliu ba ema-ne’ebé nia serbi ba.
“Maktoban nu’udár saleziana, saserdote katak bibi-atan di’ak ida entre nia bibi sira-ne’ebé nia tau-matan ba,” Padre Anacleto Pires argumenta.
Seluk, Padre Énio pesóal ne’ebé obidiente katak halo tuir de’it Maromak nia misaun, Maromak nia hakarak liuhusi simu kna’ar ho responsabilidade husi provinsiál iha rai Ekuadór to’o maktoban husik hela mundu.
Entretantu, Maktoban Padre Énio Romalho Esteves, SDB, hala’o misaun misionária saleziana iha Malona, Provínsia Santiago, Ekuadór iha-ne’ebé tuir kronolojia lakon vida bainhira akontese asidente aéreo hamutuk ho pilotu kapitaun Danny Lopes no voluntáriu Roberto Visum hafoin halo viajen husi Wishin ba Illa Wasakentsa ho objetivu halo atividade relijioza ho aviaun marka HC-BAN numéru C172 purvolta tuku 06:00 lorokraik oras rai ne’ebá nian, Segunda (26/01/2026).
Jornalista: Natalino Belo
Editór: Xisto Freitas da Piedade
