VIKEKE, 30 Janeiru 2026 (TATOLI)–Xefe Suku Dilór, Postu Administrativu Lakluta, Munisípiu Vikeke, Jacinto Ximenes informa katak Programa Nasionál Dezenvovlimentu Suku (PNDS) ba tinan 2025 iha Suku Dilór konklui ona projetu dada bee-moos ba populasaun Aldeia Boruk hamutuk uma-kain-58.
“Kuaze tinan barak populasaun Aldeia Boruk kuru bee-moos iha mota, nune’e iha tinan 2025 ami tau ba programa PNDS hodi dada bee-moos ba ita-nia populasaun, atu asesu,” Jacinto Ximenes ba TATOLI iha Postu Lakluta, Sesta ne’e.
Nia hatutan obra PNDS (dada bee-moos) ho sistema gravitasaun ne’e hahú implementadu iha fulan-Juñu 2025, orsamentu hamutuk $28.746.03.
Jacinto haktuir populasaun Boruk agora daudaun komesa ona asesu ba bee-moos.
“Ita-nia obra sistema bee-moos ne’e ita konklui ona. Horisehik mak ita halo tiha inaugurasaun ne’ebé agora ita-nia populasaun asesu ona bee-moos,” nia akresenta.
Kona-ba distribuisaun bee-moos, Jacinto esplika, distribuisaun ne’e fahe kram hamutuk neen. Husi kram neen ne’e uma-kain sanulu (10) bá leten asesu kram ida.
Obra ne’e benefísia uma-kain-58 ho totál populasaun hamutuk na’in-235 kompostu husi feto na’in-114 no mane na’in-121.
Jornalista: Vitorino Lopes da Costa
Editór: Xisto Freitas da Piedade
