Governu-CET inaugura edifísiu Konferénsia Superiór Maiór Timor-Leste iha Manleuana

DILI, 02 Fevreiru 2026 (TATOLI)—Governu liuhusi Primeiru-Ministru, Kay Rala Xanana Gusmão, no Gabinete Apoiu Sosiedade Sivíl (GASC) hamutuk ho Prezidente Konferénsia Episkopál Timorense (CET) husi Dioseze Dili, Baukau no Maliana halo inaugurasaun ba edifísiu foun Konferénsia Superiór Maiór Timor-Leste (CSM-TL, sigla portugés) iha Manleuana, Postu Administrativu Dom Aleixo, Munisípiu Dili.

Primeiru-Ministru, Kay Rala Xanana Gusmão, hateten sentru ida-ne’e la’ós de’it edifísiu ida, maibé ne’e sei sai sentru diskusaun no troka opiniaun hodi haburas morál iha sosiedade mundu modern ne’e.

“Tanba ne’e kontribuisaun ne’ebé kongregasaun oioin halo iha territóriu tomak mak fantástiku, maibé la to’o, entaun iha ne’e sei sai sentru análize, tanba ohin loron ami ko’alia kona-ba mundu kontemporáneu. Ha’u mós espresa ba madre sira ha’u-nia agradésimentu boot no admirasaun boot ba servisu ne’ebé sira halo,” Xefe Governu ne’e hateten iha Manleu, ohin.

Prezidente Konferénsia Episkopál Timorense, Dom Virgílio Kardeál do Carmo da Silva, SDB, hateten inaugurasaun no bensaun ba edifísiu foun ne’e simboliza uniaun forsa espirituál no karisma sira hotu-hotu ne’ebé kompoen iha korpu ekleziál.

“Ami la’ós de’it asina plaka ida ka loke odamatan konstrusaun ida-nian, maibé liuliu ami loke pájina foun ida iha kontribuisaun misionária moris konsagrada nian iha ita-nia nasaun,”  Arsebispu Arkidioseze Metropolitana Dili ne’e hateten.

Sede ne’e hanesan símbolu vizível katak, maske sira pertense ba família espirituál oioin, ida-idak ho nia ábitu, nia istória no nia karisma rasik, maibé sira hotu sei la’o hamutuk ho impulsu espíritu santu nian, katak ne’e espíritu ne’ebé sira kuda iha sira-nia fuan liuhusi misaun ne’ebé kristu fó ona konfiansa ba sira.

“Iha edifísiu ne’e, ami kontempla diversidade nian, kongregasaun ida-idak kontribui ho nia espiritualidade espesífika ba konstrusaun Reinu Maromak nian tanba ami rekonese ho umildade katak ami mak ema inútil, tanba ami halo de’it buat ne’ebé Maromak fó konfiansa mai ami,” nia dehan.

Tamba ne’e, sira hato’o agradesementu liuliu ba Governu Konstitusionál da-sia (IX) liuhusi subvensaun públika ne’ebé fó apoia fundamentál ba ezekusaun projetu ne’e.

Iha biban ne’e, Prezidente Konferénsia Superiór Maiór Timor-Leste, Pe. Anacleto Guterres, hateten edifísiu ida-ne’e ba kongregasaun sira-ne’ebé hala’o kna’ar pastorál iha dioseze tolu hamutuk 89 ne’ebé kompostu feto na’in-62 no mane na’in-22 no instituti sukulár hamutuk lima (5) ho ninia misionárius sira iha rai li’ur no rai laran hamutuk 1.960.

“Durante rezidénsia superiór maiór ne’ebé namkari iha Timor laran ne’e sira laiha edifísiu atu ne’ebé bele halibur hamutuk hodi halo asembleia jerál, asmebleia ordinária no mós formasaun ba kandidatu sira-ne’e laiha,” nia dehan.

Tamba ne’e, nia dehan, sira husu ba dirijente sira hodi konstrui edifísiu ida-ne’e atu bele halibur sira hamutuk bainhira iha atividade importante ruma tanba durante ne’e sira tenke aluga fatin ruma bainhira atu realiza enkontru ruma.

“Fatin ne’e ami sei uza ba halo enkontru superiór maiór, sai mós fatin formasaun ba kandidatu sira-ne’ebé iha vokasaun prepara-an atu sai amu lulik no madre iha future. Ami mós prepara kuartu 11 ne’ebé prepara ba madre sira-ne’ebé família iha Dili laiha bainhira sira mai tuir enkontru ruma iha ne’e sira bele uza atu deskansa,” nia informa.

Entretantu edifísiu ne’e konstrui iha tinan 2023 husi empreza internasionál Benevide Unipesoál, Lda, ho montante millaun $1-resin.

Jornalista : Alexandra da CostaGo

Editór       : Cancio Ximenes