DILI, 03 Fevereiru 2026 (TATOLI)—Ekipa Assalam Football Club (FC) reprezenta Grupu B hakat bá meiu finál hafoin rekolla pontu neen husi totál jogu rua iha kompetisaun Tasa Liga Federasaun Futeból Timor-Leste (FFTL) 2025.
Assalam FC iha direitu tikete hodi reprezenta Grupu B hakat bá meiu finál iha-ne’ebé manán perfeitamente iha jogu rua hanesan jogu dahuluk kontra DIT FC no jogu ikus gaña vitória kontra Nagardjo.
Elementu Adú Marques Namiruru ne’e iha jogu ikus kontra Nagardjo konsege manán ho skor mihis 1-0 iha-ne’ebé golu referidu prodús husi jogadór Augusto da Costa iha minutu 60 parte daruak nian ne’ebé hala’o iha Estádiu Munisipál Dili, Sábadu (31/01/2026).
Notísia relevante: Assalam esforsu hakarak hakat bá meiu finál
Nagardjo FC ne’ebé hala’o jogu dahuluk manán 2-1 kontra DIT FC iha oportunidade hakat bá meiu finál bainhira manán Assalam, más obrigadu tenke eliminadu hafoin rekolla pontu tolu iha tabela klasifikasaun ho produtividade golu 0, enkuantu DIT FC eliminadu dahuluk hafoin derrota daruak iha faze kualifikasaun Grupu B.
Entretantu, regulamentu jogu Tasa Liga FFTL kapítulu IV artigu 1 hateten klasifikasaun faze grupu ho sistema meia kompetisaun no artigu 2 dekreve faze meiu finál sei hala’o jogu daruak (home and away) hodi determina pontu antes hakat bá finál.
Jornalista: Natalino Belo
Editór: Xisto Freitas da Piedade
