DILI, 03 Fevereiru 2026 (TATOLI)—Ministra Saúde, Elia dos Reis Amaral, hateten Governu liuhusi Ministériu Saúde halo ona pagamentu balun ba dívida públika ba ospitál sira sira iha rai-li’ur maibé ekipa nafatin sei verifika invoice.
Notísia Relevante: 2025: Governu sei selu dívida públika millaun $10 ba ospitál iha rai-li’ur
“Ita selu ona devida, hela millaun $6 tan, ita akaba husi millaun $30 ne’ebé pasadu liu tiha ona. Agora, hetan millaun $6 atu akaba hotu to’o dívida anteriór. Ita hakarak selu dívida ita bele dehan invoice tama ita selu direta ne’e labele, tanba ita lahatene pasiente timoroan ka lae,” Ministra Elia hateten.
Nia hateten, antes ne’e deteta erru balun katak ezemplu invoice balun pasiente ne’e halo tratamentu kemoterapia ne’ebé tinan ida-nia bele kemo dala 10-resin, ida-ne’e loloos ne’e labele. Ida-ne’e signifika invoice ne’ebé la loos. Entaun Governu tenke halo pagamentu kuidadu, tanba ida-ne’e osan povu nian,” Elia dos Reis dehan.
Nia garante katak tinan ne’e Ministériu Saúde sei finaliza pagamentu ba ospitál rai-li’ur hanesan Indonézia, Malázia no Singapura.
“Tinan ida-ne’e ita bele finaliza no agradese tanba husi komisaun revizaun osamentu aloka osan ne’ebé ami nesesita, tanba ami termina ona pasiente hira nomós dívida iha momentu anteriór sira-ne’ebé rai hela. Maibé, ita hatene katak Governu mai Governu ida iha obrigatóriu atu halo pagamentu ne’ebé iha, ita labele husik de’it tanba em nome nasaun Timor-Leste,” nia dehan.
Antes ne’e, iha 06 Novembru 2025, Xefe Governu Xanana Gusmão hateten Governu Konstitusionál da-sia (IX) sei selu dívida públika millaun $10 ba ospitál sira iha rai-li’ur ne’ebé durante ne’e halo tratamentu ba pasiente transferénsia husi Timor-Leste.
“Iha tinan ida-ne’e, Governu sei selu dívida miliaun $10. Dívida ba halo tratamentu iha ospitál rai-li’ur nian, hakarak dokumentasaun ami bele aprezenta hotu. Tanba, dívida ba tratamentu iha ospitál rai-li’ur mai husi Governu da-ualu ho montante millaun $32. Maibé tanba ho kuantidade ne’e ita labele halo pagamentu hotu kedas iha tinan ida, nune’e ami ko’alia ona ho ospitál sira koonkorda malu atu selu uitoan-uitoan,” Primeiru-Ministru, Kay Rala Xanana Gusmão, hateten kestaun ne’e hodi hatán ba intervensaun husi deputadu Helder Freitas dehan dívida seidauk selu hotu, iha debate OJE 2026 nian iha loron daruak iha faze jeneralidade.
Notísia Relevante: MS selu ona divida ba ospitál tolu iha rai-li’ur
Jornalista : Felicidade Ximenes
Editór : Cancio Ximenes
