DILI, 07 Agostu 2025 (TATOLI)—Ministériu Saúde selu ona divida hamutuk millaun $16 ba ospitál iha Indonézia, Malázia no Singapura.
“Ministériu Saúde halo ona pagamentu hamutuk $16 mill, sei falta uituan atu termina, tanba balun ita sei hein invoice hodi kompleta”, Ministra Saúde, Elia dos Reis Amaral, ba jornalista sira iha Ministériu Finansa, kinta-ne’e.
Nia dehan, pasiente kuaze na’in-20 ne’ebé halo tratamentu iha tinan-2025 laiha ona duvida, sei rezolve iha tinan-ne’e.
“Pasiente ne’ebé mak bá iha 2025 nian mais 20, maibé balun sei iha ne’ebá hela no balun foin fila, ne’ebé totál pasiente hamutuk 60″, nia dehan.
Pasiente sira ne’ebé governu transfere mak bá Malázia, enkunatu Indonézia seidauk.
“Ha’u hanoin Malázia mak barak liu, neste momentu kona ba Austrália ita sei haruka, maibé ita sei eskolla, la’ós pasiente hotu-hotu bá, maibé ida-ne’ebé mak ita dehan prioridade ka importante ita manda ba, tanba ita aloka orsamentu, maibé karun entaun depende ba diagnóstika ne’ebé mak sira atu termina mai”, konklui.
Notísia relevante: Komisaun F rekomenda MS hadi’a serbisu saúde iha TL
Jornalista : Felicidade Ximenes
Editora : Rita Almeida
