VIKEKE, 03 Fevereiru 2026 (TATOLI)—Koordenadór Sentru Saúde Internamentu Munisípiu Vikeke, Francisco da Costa, relata kazu dengue ne’ebé daudaun ne’e rejistadu iha Sentru Saúde Internamentu Munisípiu Vikeke hamutuk na’in-29 no husi númeru ne’e na’in-18 rekupera ona.
“Husi loron ohin (03/02) pasiente dengue hela na’in-sanulu (10) mak iha faze tratamentu no na’in-ida (1) ami transfere ba Baukau. Ami simu informasaun daudaun ne’e ita-nia pasiente kondisaun di’ak, inklui mós na’in-rua seluk ne’ebé antes ne’e transferidu bá Baukau ne’e,” Francisco da Costa ba TATO iha Sentru Saúde Internamentu Vikeke, Tersa ne’e.
Nia haktuir progresu kondisaun atuál ba pasiente dengue na’in-sanulu ne’ebé baixa, na’in-sia (9) daudaun ne’e kondisaun di’ak, entretantu na’in-ida ne’ebé horisehik maihusi Postu Uatulari mak sei iha isin-manas hela.
“Nune’e, pesoal saúde sira kontinua akompaña pasiente sira hodi kompras ho bee, inklui fó ai-moruk hanesan parasetamól no vitamina,” nia haktuir.
Notísia relevante: SSM Vikeke rejista kazu dengue hitu, maioria labarik
Nia relata kazu dengue ne’ebé rejistadu iha Munisípiu Vikeke maihusi Suku Maluru no Suku Karaubalu ho totál na’in-28 no na’in-ida (1) ho idade tinan hitu (7) husi Suku Matahoi, Postu Administrativu Uatulari, idade adultu na’in-ualu (8) no menór idade na’in-21.
Daudaun ne’e pesoál saúde hamutuk na’in-20 kompostu husi enfermeiru na’in-14 no médiku na’in-neen (6) iha sala baixa hodi fó tratamentu ba pasiente sira inklui atende kazu dengue.
Iha fatin hanesan, Xefe Sentru Saúde Postu Vikeke Vila, João Corte-Real, haktuir kazu dengue ne’ebé ne’e maioria husi Postu Vikeke Vila liuliu iha área Suku Karaubalu no Maluru ne’ebé oras ne’e parte saúde halo prevensaun liuhusi fumiga no abate.
“Ami mós agora daudaun prepara fatin hodi antesipa karik númeru kazu sa’e ita iha ona fatin baixa iha antiga sala baixa iha internamentu. Aleinde ne’e, ha’u husu ba komunidade tenke halo limpeza ba ida-idak nian ambiente hodi prevene dengue,” nia subliña.
Jornalista: Vitorino Lopes da Costa
Editór: Xisto Freitas da Piedade
