VIKEKE, 28 Janeiru 2026 (TATOLI)—Diretór Servisu Saúde Munisípiu Vikeke, Aljaksono Soares Maia informa iha semana ne’e SSM Vikeke rejista ona kazu dengue hamutuk ema na’in-hitu (7) ne’ebé maioria afeta ba labarik ki’ik sira.
“Kona-ba kazu dengue ne’ebé ita rejista iha semana ida-ne’e, hamutuk na’in-hitu (7). Kazu dengue ne’e maioria afeta ba labarik ki’ik sira. Depoiz husi kazu dengue ne’ebé rejistadu, ita hahú halo intervensaun hodi fumiga fatin afetadu sira no distribui ai-moruk abate ba komunidade hodi tau bee,” Aljaksono Soares Maia ba jornalista sira iha resintu Administrasaun Munisípiu Vikeke, Kuarta ne’e.
Diretór SSM Vikeke husu autoridade lokál sira kontribui hodi halo prevensaun ba moras dengue tanba kazu dengue referidu perigu no ninia evolusaun ne’e lais liubá ema-nia vida.
“Presiza mós apoiu másimu husi komunidade iha Munisípiu Vikeke hodi halo limpeza iha idak-idak nia rezidénsia tanba fatin ne’ebé susuk subar ba mak bee-lihun no fo’er sira,” nia subliña.
Iha fatin ketak, Koordenadór Sentru Saúde Internamentu Munisípiu Vikeke, Francisco da Costa, haktuir katak entre ema na’in-hitu ne’ebé baixa iha Sentru Internamentu Vikeke, na’in-tolu (3) alta ona, na’in rua (2) kontinua hala’o tratamentu iha Sentru Internamentu Vikeke, entretantu na’in-rua (2) seluk transferidu bá Ospitál Rejionál Baukau.
“Karik bá-oin mak númeru kazu dengue kontinua sa’e, fatin mak sei la sufisiente tanba ita iha kama hamutuk 12 de’it. Tan ne’e, ami hakarak husu ba komunidade nafatin halo prevensaun ba kazu dengue ne’ebé daudaun ne’e ita rejista iha ita-nia munisípiu,” nia hato’o.
Francisco informa pasiente dengue na’in-rua ne’ebé transferida bá Baukau tanba kondisaun grave, entaun presiza bá ospitál referrál ne’ebé ho fasilidade medikamentu sufisiente.
Entretantu, tuir dadus, pasiente dengue na’in-hitu ne’e maihusi Aldeia Kabira-Oan na’in-haat (5), Aldeia Makalaku husi Suku Maluru na’in-ida (1) no na’in-ida (1) husi área Beloi, Suku Karaubalu, Postu Vikeke Vila.
Pasiente sira-ne’ebé afetadu ho idade tinan rua hamutuk na’in-ida (1), idade tinan haat na’in-ida (1), idade tinan lima na’in-ida (1), idade tinan neen na’in-ida (1), tinan 10 na’in-ida (1), idade tinan ualu na’in-ida (1) no tinan 15 na’in-ida (1).
Jornalista: Vitorino Lopes da Costa
Editór: Xisto Freitas da Piedade
