BAUKAU, 03 Fevereiru 2026 (TATOLI)—Autoridade munisipál liuhusi Prezidente Autoridade Munisipál (PAM) Baukau, Veneranda Eurico Lemos Martins konsidera infraestrutura hanesan estrada urbana sai rekizitu ba implementasaun podér lokál no desentralizasaun administrativa.
Lider Munisípiu Baukau ne’e konfesa, aleinde serbisu administrasaun, jestaun finanseiru no rekursu umanu, kritéria seluk ne’ebé importante mós mak estrada urbana ne’ebé sai fatór determinante atu Governu sentrál deside Munisípiu Baukau atu implementa podér lokál no desentralizasaun administrativa ne’ebé tuir planu sei estabelese iha 2027.
Nune’e bainhira Autoridade Munisipál Baukau rona informasaun husi nasionál liuhusi Ministériu Obra Públika (MOP) kona-ba hatuur fatuk dahuluk reabilitasaun estrada urbana Baukau Vila, Veneranda halo kedas preparasaun ba serimónia referida ne’ebé tuir planu sei hala’o iha loron-Sesta (06/02/2026).
“Infraestrutura bázika nu’udár devér husi Governu nian atu responde ba nesesidade bázika komunidade tomak husi Munisípiu Baukau ne’ebé sai segundu munisípiu iha territóriu nasionál hafoin kapitál Dili,” nia hateten iha ninia kna’ar fatin, Vila Nova, Baukau, Tersa ne’e.
Notísia relevante: Reabilitasaun estrada urbana Baukau Vila iha faze finaliza dezeña
Veneranda Lemos hateten nia parte koordenadu ona ho ekipa MOP no kontinua forma komisaun hodi halo preparasaun másima ba serimónia hatuur fatuk dahuluk reabilitasaun estrada urbana Baukau ne’ebé tuir ajenda sei lansa direta husi Primeiru-Ministru, Kay Rala Xanana Gusmão.
“Ami fahé ona serbisu ba malu atu halo preparasaun di’akliu hodi lansa fatuk dahuluk iha Vila Antiga,” Veneranda Lemos akresenta.
Estrada urbana iha Baukau Vila hamutuk kilómetru 23 kompostu diresaun husi Nagardjo ba Vila Antiga, Nagardjo ba rotunda Vila Nova, Vila Antiga to’o Bugaeti, rotunda Uailia Lamegua to’o Tirilolo, Rotunda Vila Nova bá Uatulete inkluindu diresaun Vila Nova bá Vila Antiga.
Entretantu, implementasaun desentralizasaun administrativa bazeia ba Konstitusaun Repúblika Demokratika Timor-Leste (KRDTL) artigu 72 nune’e loke dalan ba kriasaun lei sira hanesan Lei Númeru 23/2023, 10 Novembru, regulariza implementasaun poder lokál no desentralizasaun administrativa.
Seluk, Lei Númeru 16/2023, 31 Maiu, kona-ba finansa munisipál sei regulariza maneira hotu utilizasaun orsamentu no Lei Númeru 22/2021, 04 Novembru, kona-ba eleisaun munisipál sei regulariza mekanizmu eleisaun ba membru asembleia no prezidente autoridade munisipál.
Jornalista: Natalino Belo
Editór: Xisto Freitas da Piedade
