BAUKAU, 18 Fevereiru 2025 (TATOLI)—Prosesu reabilitasaun estrada urbana iha Baukau Vila sei iha faze finalizasaun dezeña detallada iha Ministériu Obra Publika (MOP).
Diretór Serbisu Munisipál Obra Publika (SMOP) Baukau, Agostinho Ximenes, esplika prosesu hotu relasiona ho reabilitasaun estrada urbana iha munisípiu Baukau kompeténsia tomak iha nasionál no Serbisu Munisipál iha obrigasaun atu fasilita Autoridade Administrasaun Munisipál atu hamamuk espasu públiku.
“Karik realiza iha tinan ne’e, ita apresia tanba durante ne’e komunidade Baukau preokupa ho kondisaun estrada urbana,” Diretór SMOP Baukau informa ba TATOLI iha ninia kna’ar fatin, Vila Nova, Baukau, tersa ne’e.
Agostinho Ximenes husu komunidade iha Baukau Vila atu pasiénsia no kontribui ba planu hotu ligadu ho estrada urbana iha Baukau Vila ne’ebé tuir planu sei reabilita totál iha sidade laran kompostu Vila Antiga to’o Vila Nova.
Nia seidauk fó-sai informasaun tempu ligadu ho bainhira mak projetu reabilitasaun estrada komesa maibé bainhira dezeñu detalladu ramata sei kontinua verifika iha Komisaun Nasionál Aprovizionamentu (CNA-sigla portugés) antes publika konkursu.
Mezmu nune’e, Autoridade Administrasaun Munisipál liuhosi ekipa eviksaun hahú halo eviksaun ba uma komunidade ne’ebé okupa espasu públiku nu’udár parte preparasaun ba implementa projetu reabilitasaun estrada urbana iha munisípiu Baukau.
“Ita hahú hamamuk espasu públiku hanesan parte preparasaun ba reabilitasaun estrada urbana,” Agostinho Ximenes akresenta.
Totál estrada urbana iha Baukau Vila hamutuk kilómetru 23 kompostu diresaun husi Nagardjo bá Vila Antiga, Nagardjo bá rotunda Vila Nova, Vila Antiga to’o Bugati, Rotunda Uailia Lamegua to’o Tirilolo, Rotunda Vila Nova bá Uatulete inkluindu diresaun Vila Nova bá Vila Antiga.
Jornalista: Natalino Belo
Editór: Xisto Freitas da Piedade
