DILI, 04 Fevereiru 2026 (TATOLI)—Diretora Eskola Ensinu Báziku Farol, Brígida Coelho solisita ekipa Ministériu Saúde (MS) atu halo fumigasaun, nune’e bele prevene susuk labele aumenta hodi fó moras dengue ba estudante sira.
“Ita presiza mak halo fumigasaun. Ita orienta estudante sira hamoos, maibé fumigasaun presiza hodi hamate susuk sira-ne’ebé atu fó moras dengue ba labarik sira,” Coelho dehan iha nia kna’ar fatin, Kuarta ne’e.
Nia hatutan, moras dengue bele fó ameasa ba ema nia moris, liuliu labarik ho idade kiik sira, tanba ne’e tenke prevene.
Iha Fatin seluk, Koordenadór Ensinu Baziku Filiál 639 Bebonuk, Abílio de Jesus Garcia mós husu atu halo fumigasaun, hodi prevene estudante sira husi moras dengue.
“Moras dengue perigu ba labarik idade ki’ik sira, tanba ne’e tenke prevene. Ami presiza halo fumigasaun iha arredór eskola nian, nune’e bele duni susuk tata estudante sira,” nia informa.
Tuir nia katak maneira seluk atu prevene mak hamoos lixu ne’ebe namkari no bee nalihun sira.
Nune’e mós, Koordenadór EBF 05 Komoro, Marcelino Magno, hateten atu kombate moras dengue tenke kria ambiente ne’ebé moos, liuliu iha arredór eskola sira.
“Ita hatene katak dengue ne’e mai husi susuk. Susuk ne’e gosta moris iha fo’er sira, hanesan lixu no bee nalihun sira, entaun eskola mobiliza estudante sira atu hamoos área eskola sira,” nia akresenta.
Notísia relevante: Assanami orienta MS fó-atensaun másima ba dengue
Nia husu atu ekipa saúde sira mós tun direta ona ba eskola sira, hodi fahe informasaun ba kombate moras dengue.
Hatán ba kestaun ne’e, Ministériu Saúde (MS), liuhosi Diretór Edukasaun Promosaun Saúde, Jaime dos Reis Belo rekoñese, durante tinan 2025, Ministériu Saúde la halo atividade fumigasaun masál no distribuisaun ai-moruk abate ba komunidade tanba enfrenta limitasaun iha kímiku sira, nune’e sai kauza ba moras dengue rejistu aas.
Jaime haktuir Ministériu Saúde iha planu atu halo atividade fumigasaun no distribuisaun abate masál iha kapitál Dili.
“Ita atu halo fumigasaun masál ne’e loos duni, maibé tanba limitasaun iha kímiku sira, hanesan malation ne’e, entaun ida-ne’e mak ami-nia difikuldade,” nia esplika.
Diretór ne’e informa, tuir orientasaun hosi Ministra Saúde, Elia dos Reis Amaral katak tempu badak kímika malation no abate sei to’o iha Timor, nune’e atividade fumigasaun no distribuisaun abate sei realiza.
“Abate to’o mai, ami halo kedas fumigasaun masál, hahú hosi Don Aleixo to’o iha Kristu-Rei. Ne’e orientasaun husi ministra para tenke halo fumigasaun masál,” nia dehan.
Jornalista: Osória Marques
Editór: Xisto Freitas da Piedade
