OEKUSI, 04 Fevereiru 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Crus Salu akompaña husi Diresaun Rejionál Infraestrutura (DRI), tersa horsehik, observa kondisaun estrada husi aldeia Bonemese no aldeia Noque suku Naimeko liga ba Leolbatan suku Monemeko sub-rejiaun Pante Makasar.
Notísia relevante:Autoridade observa kondisaun estrada Sabén iha Oésilo, sei reabilita ho tipu emerjénsia
Iha ámbitu observasaun ne’e, Xefe Aldeia Noque, João Anunu, aprezenta kedas preokupasaun kona-ba estrada sira barak ameasadu kotu tanba impaktu husi udan.
Tanba ne’e, Autoridade komunitáriu ne’e, rekomenda presiza tau atensaun ba estrada prinsipál husi aldeia Bonemese tanba iha fatin tolu ameasadu atu kotu totál, nune’e bele difikulta movimentu transporte no ema atu asesu ba merkadu.
“Agradese tebes ohin bele mai observa direita ami-nia dalan. Ita haree rasik iha risku duni, tanba agora tempu udan. Se ita la tau matan, neineik sei kotu totál, tanba agora ita haree, hela hakat ida de’it atu kotu ona, karreta no motorizada sira kuandu to’o fatin, sira tenke la’o neineik, foti sa’e husi foho hun, tanba sorin mai ne’e kotu ona, kala hela metru ida de’it, ita sei la liuhusi dalan ne’e, ne’ebé ami husu sei bele halo intervensaun lalais antes akontese dezastre ruma ne’ebé ita la espara tanba agora tempu udan,” nia hateten, hafoin hetan observasaun husi Prezi
dente Autoridade RAEOA ho DRI, iha aldeia Noque, tersa ne’e.
Notísia relevante:KAFI Oekusi aprova empreza tolu reabilita estrada kilometru 23 liu
Iha biban ne’e, Diretór Diresaun Rejionál Infraestrutura (DRI), Remigío Nuno Sila, responde kedas, katak antes ne’e Autoridade RAEOA atribui ona ordén serbisu ba kompañia Hilobadi Unipesoál Lda hodi normaliza ho tipu emerjénsia ho nia verba rihun $200-resin.
“Ohin ita observa ona, maibé antes ne’e ita hasai ona orden serbisu ba kompañia Hilobadi Unipesoál Lda atu ezekuta serbisu emerjénsia tanba nesesáriu duni, tanba iha fatin balun risku, rai-halai, ponte ki’ik balu kotu, entaun intervensaun autoridade mak oinsá proteze lalais atu asegura, labele difikulta movimentu transporte no ema, ne’ebé estrada ida ohin ita observa ne’e mós inklui ona sei hadi’a,” nia hateten.
Nia esplika, iha orden serbisu ne’e, proposta ne’ebé kompañia submete, nia verba rihun $200-resin, kategória emerjénsia, nune’e bele fasilita ona kompañia referida, atu hahú normaliza estrada sira-ne’ebé konsidera riksu, la’os normaliza tomak, maibé identifika de’it fatin ne’ebé ameasadu, tanba iha fatin balu, ameasdu atu kotu totál.
“Husi verba rihun $200-resin ne’e la’ós ba normalizasaun de’it maibé inklui mós fui simentu ka plan-concrete, ba fatin ne’ebé rai-tahu,” nia hateten.
Notísia relevante:Fulan ne’e, PNDS Oekusi implementa projetu reabilitasaun estrada rurál ba suku 18
Entretantu, estrada referida hahú husi suku Naimeko to’o Leolbatan suku Monemeko ho distánsia kilometru 12 no reabilita kedas iha tinan-2014.
Jornalista: Abílio Elo Nini
Editór: Rafael Ximenes de A. Belo
