DILI, 04 Fevereiru 2026 (TATOLI)-Komisaun A ne’ebé Trata Asuntu Konstitusionál no Justisa submete ona projetu Lei Orden Médiku ba meza Parlamentu Nasionál (PN) hodi bele halo diskusaun no aprovasaun.
Prezidente Komisaun A, Natalino dos Santos, dehan projetu lei ne’e iha lejislatura liubá halo ona diskusaun to’o iha faze espesialidade, maibé tanba kestaun balun maka kaduka tiha, entaun agora bankada parlamentár sira haree iha nesesidade atu haree filafali.
Tuir Konstituisaun iha artigu 97, fó dalan ba deputadu no bankada sira iha knaar bele aprezenta projetu lei. “Ba projetu lei ne’e, sei halo konsertasaun no artikulasaun ho parte Governu”, nia hateten hafoin ramata sorumutu Komisaun iha Parlamentu, ohin.
Lembra katak, iha 17 Abríl 2023, Parlamentu Nasionál, liuhusi reuniaun plenária aprova projetu Lei númeru 52/V(5a)-Orden ba Médiku Timor-Leste, iha faze jeneralidade.
Nune’e meza Parlamentu envia hikas projetu lei ne’e ba Komisaun A hodi diskute kada artigu iha espesialidade. Projetu lei ne’e iha artigu hamutuk 132, hahú husi Kapítulu I to’o Kapítulu IX kona-ba Dispozisaun finál artigu 131-132.
Ba projetu lei ne’e, Komisaun hala’o ona audiénsia públika hodi rona hanoin husi entidade lubun mak hanesan Asosiasaun Médiku, Ministériu Saúde, advogadu no espesialista saúde nian hothotu hodi apoiu inisiativa ne’e, tanba tinan 20 ona bainhira laiha orden idaidak hala’o konforme nia hakarak, maibé lei ne’e kaduka tiha.
Projetu lei ne’e nia konteúdu atu harii orden médiku ba médiku sira iha Timór sira-nia orden. Nune’e mós, Estadu bele kontribui tanba mai ho objetivu atu hadi’ak kualidade asisténsia médika ba saúde públika iha rai-laran, ne’ebé entre Estadu no orden médiku tenke serbisu hamutuk atu regula.
Jornalista: Nelson de Sousa
Editora: Maria Auxiliadora
