BOBONARU, 04 Fevereiru 2026 (TATOLI)- Populasaun sira iha postu administrativu Maliana, munisípiu Bobonaru, lamenta ho kondisaun estrada trosu ba bairru ne’ebé empreza internasionál Bina Mitra Sarana reabilita, tanba kauze laiha sistema drenajen ne’ebé adekuadu.
Xefe Suku Holsa, António Santa Cruz, ne’ebé reprezenta komunidade dehan maioria estrada sira liga ba área rezidente sira laiha drenajen, hanesan trosu bá iha ospitál tuan, Holsa, no área sira seluk ne’ebé konsidera hanesan vulneravel no ba futuru bele akontese inundasaun.
Notísia relevante: Reabilitasaun estrada Maliana hatudu progresu, “Ida-ne’e mak ami povu nia hakarak”
“Ami preokupa ho situasaun ida-ne’e, tanba estrada ne’e ita halo ona reabilitasaun, maibé drenajen laiha maka aban-bainrua sei fó mós impaktu ba estrada ne’e. Tuir ha’u-nia hanoin tenke iha drenajen para ita bele normaliza tiha bee ne’ebé sai husi estrada, husi komunidade nia uma-ninin para labele estraga fali estrada sira ne’ebé oras ne’e ita nahe ona alkatraun”, nia informa ba jornalista sira, iha sede suku Holsa.
Tuir nia, drenajen ne’e krusiál tebes atu regula fluxu udan-been nian husi estrada sira no área rezidensiál sira, hodi prevene danu sira ba infraestrutura sira ne’ebé eziste. Tanba ne’e, nia rekomenda ba Ministériu Obra Públika (MOP) halo revizaun ba dezeñu no Bill of Quantities (BoQ) ba projetu estrada ne’e.
“Horisehik ha’u hatama karta ida ba Diresaun Obra Públika Munisípiu atu konsidera, nune’e drenajen ne’ebé seidauk konstrui bele inklui, nune’e evita estragu iha futuru ba alkatraun no rezidente sira-nia uma”, nia hateten.
Domingos da Costa, Sekretáriu Autoridade Munisípiu Bobonaru ba Asuntu Administrasaun no Finansa afirma katak autoridade atu halo fiskalizasaun ba projetu ne’e iha Governu sentrál nia liman. Maski nune’e, autoridade munisipál mós hato’o preokupasaun kona-ba impaktu sira husi komunidade.
Hatán ba kestaun ida-ne’e, Koordenadór Infraestrutura Ministériu Obra Públika Munisípiu Bobonaru, Fernando de Fátima, esplika katak kanál drenajen balun konstrui tiha ona, maibé seluk la inklui iha dezeñu inisiál noBoQ.
“Ami agora prepara hela dezeñu adisionál sira no submete ona ba nivel nasionál hodi hetan aprovasaun. Kuandu hetan aprovasaun husi nasionál, se fó ba Bina Mitra mak kontinua ga la’e, depende ba desizaun iha leten. Projetu ne’e mai atu halo kompleta obra ne’ebé agora iha, ita halo obra ne’e katak nia tenke sempurna, maibé iha buat balun ne’ebé ita bele hetan ona iha munisípiu ida-ne’e, liuliu iha Maliana hanesan estrada, bee-dalan”, katak.
Kona-ba preokupasaun komunidade nian ne’ebé kestiona modelu trotoár hodi taka tomak irrigasaun husi diresaun Eskola Sekundária Jerál Don Martinho da Costa Maliana to’o Holsa, Fernando esklarese katak empreza Hutama Karya husik hela espasu bee atu fornese ba natar ezistente.
Nia subliña katak projetu estrada ne’e seidauk kompleta porsentu 100 tanba sei iha faze finalizasaun ba serbisu ki’ik balun, tanba ne’e Fernando husu ba públiku atu pasiénsia tanba MOP rekolla hela dadus hodi kompleta kanál drenajen sira ne’ebé iha.
Tuir dadus husi MOP, progresu fíziku husi projetu estrada ne’ebé hala’o husi Hutama Karya atinji ona pursentu 95,79, enkuantu Bina Mitra Sarana atinje pursentu 99,30. Projetu ne’e agora tama iha faze finál sira kompleta molok entrega.
Obra ne’e pakote ne’ebé empreza Hutama Karya ezekuta ho valór orsamentu millaun $21 no Bina Mitra millaun $12.
Notísia relevante: PAM Bobonaro husu empreza HK-BMS ezekuta projetu estrada Maliana ho kualidade
Jornalista: Sergio da Cruz
Editora: Maria Auxiliadora
