BOBONARO, 22 janeiru 2025 (TATOLI)—Prezidente Autoridade Munisípiu (PAM) Bobonaro, Alexandre Pires, akompañadu husi diretór Servisu Munisipál Obra Públika no Diretór Ajénsía Fiskalizasaun Munisipál, kuarta ne’e, hala’o vizita ba Base-Camp ka kampaun empreza Internasionál PT Bina Mitra Indohsejatera (BMS) iha área Kolejíu, suku Ritabou no PT Hutama Karya iha área Nunura, suku Tapo-Memo.
Vizita ne’e bazeia ba orientasaun husi Primeiru-Ministru, Kay Rala Xanana Gusmao, oinsá bele haree direta ekipamentu no materiál ne’ebé empreza rúa ne’e atu utiliza ba reablitasaun estrada urbana Maliana vila pakote I no II.
Prezidente Autoridade Munisípiu (PAM) Bobonaro, Alexandre Pires, hatete materiál no ekipamentu sira husi empreza Internasionál rúa ne’e sufisiente no preparadu ona atu aselera servisu fiziku iha terrenu hodi ezekuta projetu estrada Maliana ho kualidade.
Notísia Relevante: Bina Mitra hahú reabilita estrada trosu ba bairru iha Maliana
“Ami presiza ninia kualidade, tanba ha’u ho komunidade presiza Dezenvolvimentu. Ha’u mós orienta ona administradór postu sira atu haruka traballadór husi postu seluk, ami atu aselera servisu. Ne’e parte ida imi hetan osan, parte ida mós rezultadu servisu imi-nian,” Alexandre Pires hato’o deklarasaun ne’e durante ko’alia ho jestór PT Hutama Karya no BMS iha Koléjíu
Diretór Servisu Ministériu Obra Públika Munisípiu Bobonaro, Marcelino Godinho, reforsa tuir relatóriu husi PT Hutama Karya no Bina Mitra Indohsejatera semana liubá hatudu katak, progresu fíziku ba implementasaun projetu rua ne’e pakote I atinje ona 15% no pakote II atinje ona 10,15%
“Tuir oráriu, sira husi kompañia Hutama Karya iha fevreiru ne’e sira Nahe ona alkatraun, tanba alkatraun (aspal) iha ona, materiál ms prontu ona. Sira-nia mákina Alkatraun Micser Pland (AMP) mós prontu hotu ona, agora kompañia BMS nia planu iha fulan marsu ou abríl,” nia dehan.
Diretór ne’e dehan, Autoridade Munisípiu Bobonaro mós fó apoia ba empreza rua ne’e oinsá atu rezolve problema sosiál iha terrenu, nune’e bele aselera servisu bazeia ba orientasaun husi Primeiru-Ministru, Kay Rala Xanana Gusmao.
Enkuantu projetu rua ne’e pakote I ne’ebé ezekuta husi PT PT Bina Mitra Indohsejatera (BMS) gasta orsamentu millaun $12-resin no pakote II ne’ebé ezekuta husi empreza Hutama Karya (HK) ho montante millaun $21.
Notísia Relevante: Hutama Karya ke’e ona estrada kilómetru rua iha Nunura
Jornalista : Sérgio da Cruz
Editór : Cancio Ximenes
