BOBOANARO, 05 agostu 2024 (TATOLI) – Empreza internasionál Bina Mitra Indosejahtera, hahú implementa servisu fíziku hodi halo reabilitasaun estrada pakote I trosu ba bairru-bairru (lokál rute) iha Maliana vila, munisípiu Bobonaro.
Komunidade Maliana, Domingos Afonso, sente kontente no konsidera ho implentasaun projetu ne’e bele responde ona komunidade sira-nia preokupasaun.
Notísia relevante: Governu hatuur fatuk dahuluk ba projetu reabilitasaun estrada urbana Maliana pakote I
“Ami povu hein estrada ida-ne’e, tinan 20-resin ona, ohin loron ita-nia Governu halo ona, ami sente kontente, tinan oin ne’e ami bele la’o ona iha estrada kabeer nia leten,” nia informa ba TATOLI, iha rotunda Maliana, tersa ne’e.
Iha fatin seluk, komunidade Josefina Mendonça, espera empreza konstrutora sei finaliza obra ne’e ho rezultadu kualidade hodi fasilita movimentasaun públiku.
“Ami tinan barak nia laran, la’o ba mai ne’e hanesan iha mota laran, udan mai araska loos, agora kompañia mai halo ona ne’e, ami sente hanesan grasa ida, tanba ami hetan projetu rua dala-ida, ida iha sidade laran ne’e di’ak, tama ba bairru-bairru mós di’ak ona, ami Maliana mós sai sidade ona,” nia katak.
Enkuantu tuir observasaun Ajénsia TATOLI iha terrenu nota katak, serbisu fíziku dudu rai ne’e iha parte suku Tapo-Memo, husi diresaun eskola Dom Martinho da Costa Lopes Maliana ba SMP 2 konklui ona no daudaun ne’e nia área bairu Setembru Negro, Rokon. Obra ne’e implementa ho kustu millaun $12, durasaun kontratu tinan ida fulan-ualu.
Notísia relevante: Komunidade espera Bina Mitra ezekuta projetu estrada Maliana I ho kualidade
Jornalista:Sérgio da Cruz
Editór: Evaristo Soares Martins
