BOBONARO, 04 jullu 2024 (TATOLI) – Ministru Obras Públika (MOP), Samuel Marçal, hamutuk ho Ministru Transporte no Komunikasaun, Miguel Marques Gonçalves Manetelu no Prezidente Komisaun E (Infraestrutura) Parlamentu Nasionál, Deputadu Marcos Xavier, kinta hatuur fatuk inan dahuluk ba projetu reabilitasaun estrada urbana Maliana Vila pakote I kategoria lokál rute.
Estrada ne’e sei tama dalan sanak sira ho nia trosu ba bairru sira hanesan; Boracha-laran, Igreja Parókia Santa Cruz, Maliana ba ospitál tuan, Rokon, Odomau to’o ba Tapo-Memo hodi kobre Maliana Vila tomak ho totál distánsia kilómetru 28.
Notísia relevante: Governu hatuur fatuk dahuluk ba projetu estrada urbana Maliana
“Ohin ita mai halo serimónia ida-ne’e, serimónia ida ke durante ne’e ita hein no hanoin, durante ne’e ita hotu hakarak, ohin mehi ne’e sai realidade, espera katak 2025 ka 2026 bele konklui ona,” Ministru Samuel Marçal, hateten iha serimónia ne’e.
Governante ne’e apela ba parte hotu-hotu atu kolabora no koopera ho kompañia Bina Mitra nune’e obra bele finaliza tuir kontratu serbisu, atubele fasilita movimentasaun transporte públiku no privada.
“Imi-nia kontribuisaun mak imi-nia kolaborasaun, haree ba hamutuk ho kompañia ne’ebé iha, labele hadau-malu, labele impede malu, sé mak impede, ha’u la mai tán, ha’u telefone kompañia mai tula sasán hotu fila ba halo iha fatin seluk. Sira tún husi ne’e ba Lourba ba Atsabe mós hein hela, imi lakohi muda ba sira, hakarak serbisu mai tau naran hateten ba kompañia hada fatuk ruma, kahur sumenti ruma atu imi hetan osan, maibé labele impede malu,” nia fó hanoin ba abitante lokál sira.
Prezidente Komisaun E ne’ebé trata asuntu Infraestrutura, Deputadu Marcos Xavier, sente orgulu no apela ba kompañia manán-na’in atu ezekuta obra ne’e ho responsável nune’e finaliza ho susesu no kualidade.
“Ha’u fiar katak obra ne’e la’o ho di’ak, iha problema karik, tenke kordena ba autoridade lokál sira, liuliu autoridade munisípiu, ha’u fiar katak molok tama Natál ne’e tenke kabeer ona ona,” nia katak.
Prezidente Autoridade Munisípiu Bobonaro, Alexandrino Pires, agradese ba governu tanba ho implementasaun projetu ne’e bele responde ona komunidade nia halerik durante tinan 20-resin.
“Ha’u sente ba kmaan ona, hakma’an ona inan-aman sira, liuliu iha postu Maliana sira-nia susar tomak, tanba durante ne’e problema boot ba ami mak estrada, dalaruma iha loron-boot atu partisipa iha eventu sira, susar tebes ba ami iha tempu udan, tanba estrada kuak tama to’o Igreja ida-ne’e sai triste ba ha’u hanesan prezidente Autoridade,” nia espresa.
Enkuantu obra ne’e ezekuta husi kompañia internasionál Bina Mitra Indosejahtera ho kustu millaun $12 ho durasaun kontratu tinan ida fulan-ualu no sei finaliza iha fulan outubru tinan 2025.
Empreza Bina Mitra Indosejahtera nu’udar kontratór jerál Indonézia nian ne’ebé hala’o iha dragajen no reklamasaun, konstrusaun portu nian, rede estrada, túnel, ponte, fábrika no projetu infraestrutura besi nian. Ho ámbitu negósiu ne’ebé luan, empreza ne’e subliña kualidade no seguransa konstrusaun nian ho ezijénsia no padraun tékniku sira-ne’ebé rigoroza tebes tanba hetan sertifikasaun ISO 9001:2015 iha sistema jestaun kualidade, sistema jestaun ambientál ISO 14001:2015, no OHSAS 18001:2007 iha saúde no sistema jestaun seguransa serbisu nian.
Notísia relevante: Kompañia PT. Hutama sai manán na’in ba reabilitasaun estrada urbana Maliana
Jornalista: Sérgio da Cruz
Editór: Evaristo Soares Martins
