iklan

EKONOMIA, BOBONARO, HEADLINE, MUNISÍPIU

Governu hatuur fatuk dahuluk ba projetu estrada urbana Maliana

Governu hatuur fatuk dahuluk ba projetu estrada urbana Maliana

Prezidente Parlamentu Nasionál, Deputadu Aniceto Guterres Lopes, akompaña hosi Vise Primeiru Ministru, José Maria dos Reis no Ministru Obra Públika, Abel Pires, hatuur fatuk dahuluk ba projetu reablitasaun estrada urbana Maliana, munisípiu Bobonaro. Imajen Tatoli/Sérgio da Cruz.

MALIANA, 01 Maiu 2023 (TATOLI)- VIII Governu Konstitusionál, kinta ne’e hatuur fatuk dahuluk ba projetu reabilitasaun estrada urbana Maliana pakote II iha munísipiu Bobonaro.

Iha serimónia hatuur fatuk dahuluk ne’e marka prezensa hosi Prezidente Parlamentu Nasionál, Deputadu Aniceto Longuinhos Guterres Lopes, Vise-Primeiru Ministru, José Reis no Ministru Obras Públika, Abel Pires.

Estrada modelu pista rua ka dua jalur ne’e ho distánsia kilómetru 4,91 no luan metru 23.

Vise-Primeiru Ministru, José Reis, hateten obra ne’e nu’udar kompromisu governu nian hodi fasilita movimentasaun no asesu públiku, liuliu ba liña fronteira nune’e povu munisípiu Bobonaro labele sente diferensa ho povu hosi nasaun viziñu Repúblika Indonézia.

Notísia relevante: Reabilitasaun estrada urbana Maliana hein vistu hosi Tribunal

“Dezenvolvimentu munisípiu Bobonaro liuliu ita-nia kapitál munisipál ka reprezenta mós pasu importante ba fiksasaun populasaun iha munisípiu ida-ne’e ba aban bainrua, sei sai mós sentru movimentasaun komersiál no movimentasaun ema-nia rejiaun ka zona fronteira no sei kontribui maka’as ba  dezenvolvimentu ekonómiku nasionál ho kriasaun empregu no movimentu merkadu hosi rai-li’ur ba rai laran no iha futuru bele kontribui mós ba nível esportasaun no kria rede merkadu hosi rai-laran no rai-li’ur,” nia katak.

Ministru Obra Públika, Abel Pires, fundamenta governu mós aprovoka ona estrada Pakote I hodi kompleta  estrada Urbana Maliana Vila.

“Pakote rua ne’e sei hadi’ak hamutuk halo furak liután sidade Maliana, agora daudaun depois aporvasaun hosi Konsellu Ministru sei haruka ba Kámara Kontas atu vistu, depois ita halo lansamentu ona, entaun rua ne’e bele la’o hamutuk, iha tinan ida rua tán Maliana iha mundansa boot,” Governante ne’e dehan.

Prezidente Parlamentu Nasionál, Deputadu Aniceto Guterres Lopes, agradese ba VIII Governu ne’ebé durante ne’e esforsu maka’as, maske hasoru difikuldade oinoin, maibé molok mandatu ramata konsege implementa obra ne’e.

“Ha’u sente orgullu no haksolok tebes ba loron ida ohin, tanba prosesu atu to’o ba ohin loron ne’e naruk tebes, povu nunisípiu Bobonaro, komunidade Maliana halerik kleur tebes, ohin ita komesa hahú no ita hein katak Maliana sei nabilan,” Deputadu ne’e hateten.

Jestór projetu hosi kompañia PT Hutama Karya, Wahyu Hertianto, optimista sei serbisu tuir kontratu ne’ebé iha no garante sei fornese materiál ho kualidade hosi nasaun Indonézia no material lokál iha Timor-Leste tuir  espesifikasaun obra ne’e.

“Ami presiza mós apoia hosi munisipiu Bobonaro ho nasionál  atu nune’e serbisu hotu bele la’o ho di’ak, no fó rezultadu ho kualidade ne’ebé di’ak,” Wahyu dehan.

Obra ne’e responsabilidade hosi empreza PT Hutama Karya ho millaun $21-resin ($21,228,762.00) ho durasaun kontratu tinan ida fulan-neen.

Notísia relevante: ANLA emite ona lisensa ambientál ba projetu estrada Maliana

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!