BOBONARO, 22 jullu 2024 (TATOLI) – Komunidade sira espera empreza internasionál Bina Mitra Indosejahtera ezekuta projetu reabilitasaun estrada Maliana Vila pakote I ho responsabilidade no rezultadu ne’ebé kualidade nune’e bele dura ba tempu naruk tanba obra gasta orsamentu ho montante boot.
Komunidade Malianan, Augusto Fernandes, sente kontente no orgullu ho projetu ne’e tanba daudaun ne’e estrada kada bairru iha Maliana Vila fiziku kuaze aat hotu.
Notísia relevante: Governu hatuur fatuk dahuluk ba projetu reabilitasaun estrada urbana Maliana pakote I
“Ha’u hanoin kompañia ida atu halo ne’e, kompañia internasionál, ita la dúvida, signifika sira iha osan, materiál kompletu no iha esperiénsia barak ona, ne’ebé ami
husu hadi’ak karik, sé bele halo didi’ak ba, importante ninia kualidade, atubele fasilita ami halo movimentu ba mai, tanba estrada ne’e ami povu iha Maliana hein tinan 20-resin ona, foin agora mak ita-nia governu atu halo,” nia informa ba Jornalista Tatoli, iha Rotunda Maliana, segunda ne’e.
Tuir nia, bainhira projetu ne’e finaliza Maliana sei sai kapitál munisípiu ida-ne’ebé nabilan no kabeer.
“Agora ami la’o ba mai ho motorizada no karreta sei sente doko-aan tún sa’e, tanba estrada sira kuaze Maliana laran, liuliu sa’e ba ospitál tuan ne’e ,kuak hotu, tempu udan ita haree hanesan mota, maibé ho projetu ida-ne’e, ami espera tinan rua tán ami bele la’o ona iha aspál leten, ba mai la sente kolen ona hanesan agora,” nia katak.
Komunidade Felicidade dos Santos Araújo, agradese ba governu anteriór no governu atuál ne’ebé konsege tau ona prioridade ba hadi’ak estrada ne’e.
“Ami hein atu hadiak estrada ida-ne’e kleur ona, ne’ebé foin lalais tau-fatuk dahuluk iha bairu ne’e , ho tan ida tinan kotuk halo estrada urbana ne’e ami sente hanesan ami Maliana mós la lakon ona, tinan ida rua tan ami bele sente dezenvolvimentu hanesan munisípiu seluk, ne’ebé agora estrada kabeer ona ne’e, tanba Maliana ne’e iha kedas odamatan boot ho Indonézia,” nia akresenta.
Nia husu empreza konstrutora atu aselera prosesu mobilizasaun materiál, molok udan monu-rai.
Alende ne’e rekomenda ba Ministeriu Obras Públika atu halo kontrolu rutina, nune’e implementasaun projetu ne’e bele finaliza tuir kontratu servisu ne’ebé governu atribui ba empreza referida.
“Ami hakarak projetu ne’e hotu lalais, atu ami mós bele sente la’o iha estrada kabeer, ami ezije hakarak lalais ne’e tanba udan mai ona dalaruma servisu la’o para, la’o para, entaun kontratu dehan tinan ida liu ne’e bele to’o tinan rua ka tolu, tanba udan mai ema servisu ladi’ak, maibé ami fiar katak buat hotu sei la’o ho di’ak,” nia hateten.
Enkuantu obra ne’e sei gasta orsamentu millaun $12 ho durasaun kontratu tinan ida fulan ualu.
Empreza Bina Mitra Indosejahtera nu’udar kontratór jerál Indonézia nian ne’ebé hala’o iha dragajen no reklamasaun, konstrusaun portu nian, rede estrada, túnel, ponte, fábrika no projetu infraestrutura besi nian. Ho ámbitu negósiu neʼebé luan, empreza ne’e subliña kualidade no seguransa konstrusaun nian ho ezijénsia no padraun tékniku sira-neʼebé rigoroza tebes tanba hetan sertifikasaun ISO 9001:2015 iha sistema jestaun kualidade, sistema jestaun ambientál ISO 14001:2015, no OHSAS 18001:2007 iha saúde no sistema jestaun seguransa serbisu nian.
Notísia relevante: Governu foun presiza aselera estrada Maliana pakote I
Jornalista: Sérgio da Cruz
Editór: Evaristo Soares Martins
