MALIANA, 16 junu 2023 (TATOLI) – Xefe suku Holsa, postu administrativu Maliana, munisípiu Bobonaro, António Santa Cruz, hateten governu foun presiza aselera prosesu reabilitasaun estrada urbana Maliana Vila pakote I hodi kompleta pakote II ne’ebé VIII Governu lansa ona iha loron 01 fulan-juñu ne’e.
Enkuantu estrada ne’e VIII Governu Konstitutuisionál liuhosi reuniaun Konsellu Ministru iha loron 31 fulan-maiu tinan 2023 ne’e aprova ona prosedimentu administrativu ho valór estimasaun millaun $13.
Notisia relevante: MOP konklui verifikasaun estrada Maliana ba Bobonario no Lolotoe
“Tuir informasaun ne’ebé ami simu katak estrada ne’e tama sai suku no bairru-bairru. Ida-ne’e ami entrega tomak ba Nono Governu atubele aselera, konstrusaun rua ne’e bele la’o besik malu, ho faze ida foin lais lansa tiha ne’e ho mós faze ida tuir mai ne’e labele dook malu, atu nune’e serbisu bele tuituir malu atubele lori dezenvolvimentu ne’e bele la’o ho di’ak,” nia informa ba jornalista sira iha Maliana, sesta ne’e.
Xefe suku ne’e agradese ba esforsu hosi governu atuál ne’ebé konsege lansa ona estrada urbana Maliana Vila pakote II tanba estrada modelu pista rua ho distánsia kilómetru 4,91 no luan metru 23 ne’e ba futuru kapitál munisípiu Bobonaro sei sai nabilan.
Maibé líder lokál ne’e rekomenda ba Governu foun mai atu rezolve komunidade ne’ebé afetadu hosi obra refere.
“Estrada ne’e ami-nia mehi kleur ona, agora ba oin ami prontu atu koopera ho kualkér atividade ne’ebé maka governu sentrál implementa,” nia katak.
Administradór postu administrativu Maliana, munisípiu Bobonaro, Tomás Laco-Loe, konsidera estrada pakote rua ne’e sei hafurak no transforma Maliana sai sidade.
“Hakarak ka lakohi governu tuan husik nia mandatu, governu foun tenke ser kontinua aselera projetu ne’e, tanba di’ak ba povu no rai ida-ne’e,” nia fó hanoin.
Notísia relevante: Governu hatuur fatuk dahuluk ba projetu estrada urbana Maliana
Jornalista : Sérgio da Cruz
Editór : Evaristo Soares Martins
