BOBONARU, 04 Janeiru 2026 (TATOLI) – Ospitál Referénsia Maliana (HRM, sigla portugés) rejista, dezde Janeiru, kazu pasiente ho moras dengue hamutuk na’in-28. Husi númeru ne’e, 21 mak rekupera ona, no hitu sei kontinua simu tratamentu iha sala enfermaria.
Diretór-Ezekutivu HRM, José Marçal da Cruz, dehan pasiente sira-ne’e mai husi postu administrativu Kailaku no maioria husi Maliana Vila.
Notísia relevante: Saúde Bobonaru rejista kazu dengue 16
“Ami simu pasiente sira mai halo konsulta iha doutór sira, halo ezaminasaun raan dengue nia iha laboratóriu no hahú husi fulan Janeiru to’o ohin-loron rejistu moras ne’e totál pasiente 28, hela na’in-hitu mak baixa hela. Pasiente sira baixa ne’e maioria kazu leve ka natoon, la grave”, nia relata ba Tatoli.
Atu prevene moras dengue, José Marçal hateten katak pesoál saúde HRM mós halo promosaun no edukasaun saúde ba família pasiente sira, inklui komunidade ne’ebé mai konsulta iha sala OPD (Outpatient Department) no servisu saúde sira seluk tan.
“Ospitál ne’e halo atendimentu sekundáriu, maibé nafatin halo promosaun para ita prevene susuk labele tata ema, nune’e moras dengue labele afeta ba ema”, dehan.
Dengue hanesan moras ida-neʼebé kauza husi infesaun ho vírus dengue, ne’ebé tranzmite liuhusi tata susuk Aedes Aegypti ka Aedes albopictus. Moras ida-ne’e barak mosu iha área tropikál no subtropikál, inklui iha Timor-Leste.
Notísia relevante: Saúde Bobonaru rejista kazu dengue 43 maioria afeta ba labarik sira
Jornalista: Sergio da Cruz
Editora: Maria Auxiliadora
